Rusiyanın idman naziri: Azərbaycanla əməkdaşlığımız möhkəmlənir
Bakı, 2 iyul, AZƏRTAC
Bu gün beynəlxalq idman gündəliyinin ən vacib məsələlərini müzakirə etdik. Xüsusilə UNESCO-nun bu sahədə dəstəyi bütün ölkələr üçün vacibdir.
AZƏRTAC xəbər verir ki, bu sözləri Rusiyanın idman naziri Mixail Deqtyarev Bakıda UNESCO-nun İdmanda Dopinqə Qarşı Beynəlxalq Konvensiyası çərçivəsində Dopinqin İdmanda Aradan Qaldırılması Fondunun Təsdiq Komitəsinin üçüncü rəsmi iclası barədə danışarkən deyib.
O, Azərbaycanın gənclər və idman naziri Fərid Qayıbovla uzun illərdir əməkdaşlıq etdiklərini qeyd edərək, onun UNESCO-nun İdmanda Dopinqə Qarşı Beynəlxalq Konvensiyasının Tərəflərin Konfransına sədrlik etdiyi dövrdə təşkilatın fəaliyyətinə yeni impuls verdiyini vurğulayıb: “Komitənin iclasında anti-dopinq sisteminin inkişafı, xüsusilə kiçik və inkişaf etməkdə olan dövlətlərdə bu sahədə institutların gücləndirilməsi ilə bağlı məsələlər müzakirə olunub və müvafiq qərarlar qəbul edilib”.
Nazir Azərbaycanın beynəlxalq idman tədbirlərinin yüksək səviyyədə təşkilində də təcrübəsini xüsusi qeyd edib. O, ölkəmizin uğurla ev sahibliyi etdiyi MDB Oyunlarını xatırladaraq yarışların yüksək təşkilatçılıq səviyyəsində keçirildiyini bildirib: “Biz hər zaman Azərbaycan idmançılarını və ümumilikdə Azərbaycan tərəfini həm yarışlarda, həm müxtəlif konfranslarda, forumlarda, həm də beynəlxalq təşkilatlardakı səsvermələrdə dəstəkləyirik. Ona görə də əməkdaşlığımız möhkəmlənir. Biz idmanda Azərbaycan tərəfinin dəstəyini hiss edirik və özümüz də hər zaman bu dəstəyi göstəririk”.
Mixail Deqtyarev Bakı ilə bağlı təəssüratlarını da bölüşərək şəhərin memarlığını, təmizliyini və sakinlərin qonaqpərvərliyini yüksək qiymətləndirib: “Bakı çox gözəl şəhərdir. Buradakı memarlıq şedevrləri insanı valeh edir. Şəhər çox təmizdir, insanları isə qonaqpərvərdir. Qonaqpərvərliyə görə təşəkkür edirəm”.
Bölmənin digər xəbərləri
