Avropa İttifaqı Azərbaycanı Cənubi Qafqazda sabitliyin təminatçısı kimi görür- Ekspert rəyi
Bakı, 2 iyul, AZƏRTAC
Cari ilin ilk yarısında Avropa İttifaqının iki aparıcı institutunun rəhbəri Azərbaycana səfər edib. Mart ayında Avropa İttifaqı Şurasının Prezidenti Antonio Koşta, iyulun 1-də isə Avropa Komissiyasının Prezidenti Ursula Fon der Lyayen Bakıya gəlib. Hər iki ali qonaq Azərbaycan haqqında yüksək fikirlər səsləndirərək, rəsmi Brüsselin Azərbaycanla münasibətləri yeni mərhələyə çıxarmaq niyyətində olduğunu nümayiş etdiriblər.
Bu sözləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
“Bu dinamika onu göstərir ki, Avropa indi Azərbaycanı yalnız enerji təchizatçısı kimi deyil, həm də bütövlükdə regional təhlükəsizlik, nəqliyyat-kommunikasiya və iqtisadi inteqrasiya baxımından əsas tərəfdaş hesab edir. Təsadüfi deyil ki, Ursula Fon der Lyayen Azərbaycanı Avropa İttifaqının "strateji tərəfdaşı" adlandırdı. Öz çıxışında vurğuladı ki, dünyada az sayda ölkə Azərbaycan qədər regional əməkdaşlığın və sabitliyin inkişafına töhfə vermək imkanına malikdir. Bu qiymətləndirmə diplomatik protokolun tələbi olmaqdan daha çox, son illərdə formalaşmış əməkdaşlığın siyasi etirafı və Azərbaycanın regionun lider dövləti kimi qəbul olunduğunun nümayişidir”, - deyə M.Ələsgərli vurğulayıb.
Onun sözlərinə görə, Ursula Fon der Lyayenin çıxışında xüsusi diqqət çəkən məqamlardan biri də Prezident İlham Əliyevin həyata keçirdiyi xarici siyasət kursuna verdiyi yüksək qiymət idi. O, Azərbaycanın sülh gündəliyinə verdiyi töhfəni, regional sabitliyin təmin edilməsində oynadığı rolu və gələcəyə hesablanmış strateji baxışını xüsusi vurğuladı. Bu bəyanatlar göstərir ki, Avropa İttifaqı Cənubi Qafqazda uzunmüddətli sabitliyin əsas təminatçılarından biri kimi məhz Azərbaycanı görür.
“Lyayenin "Enerji Konnektivliyi üzrə Tərəfdaşlıq Platforması" yaradılması təşəbbüsünü irəli sürməsi də diqqətəlayiqdir. Bu ideya enerji, nəqliyyat və rəqəmsal infrastruktur layihələrinin vahid platformada əlaqələndirilməsinə xidmət edir və Azərbaycanın tranzit imkanlarını daha da artırmaq potensialını nümayiş etdirir. Azərbaycanın zəngin bərpaolunan enerji potensialı, Xəzər dənizində külək enerjisi layihələri və Mərkəzi Asiya ölkələrinin yaşıl enerji imkanlarının Azərbaycan üzərindən Avropaya ötürülməsi artıq strateji layihə kimi qiymətləndirilir. Nəzərə almaq lazımdır ki, 2022-ci ildə Avropa Rusiyadan qaz tədarükünün azalması fonunda ciddi enerji böhranı ilə üzləşərkən alternativ mənbə kimi Azərbaycana müraciət etmişdi. Həmin vaxt imzalanmış Azərbaycan ilə Avropa İttifaqı arasında “Avropa Komissiyası tərəfindən təmsil olunan Avropa İttifaqı ilə Azərbaycan Respublikası arasında enerji sahəsində Strateji Tərəfdaşlığa dair Anlaşma Memorandumu” ölkəmizin Avropa İttifaqına qaz ixracı təxminən 65 faiz artıb. Hazırda Azərbaycan qazı Avropa İttifaqının on üzv dövlətinə çatdırılır və bu coğrafiyanın daha da genişləndirilməsi planlaşdırılır. Bu fakt Azərbaycanın Avropanın enerji təhlükəsizliyində artıq sistem yaradan aktora çevrildiyini göstərir”, - deyə Müşfiq Ələsgərli bildirib.
O hesab edir ki, səfər çərçivəsində Ermənistan-Azərbaycan münasibətlərinin normallaşdırılması prosesinə Avropa İttifaqının iqtisadi dəstəyinin elan edilməsi də xüsusi əhəmiyyət daşıyır. Sərhədyanı ərazilər üçün 20 milyon avroluq yardım paketi, minalardan təmizləmə, səhiyyə, bacarıqların inkişafı və yerli biznesin dəstəklənməsi üzrə layihələr sülhün iqtisadi əsaslarının formalaşdırılmasına hesablanıb.
“Bu yanaşma göstərir ki, Avropa İttifaqı regionda dayanıqlı sülhün yalnız siyasi deyil, iqtisadi əməkdaşlıq vasitəsilə də möhkəmlənəcəyini hesab edir. Ursula Fon der Lyayenin Bakı səfəri bir daha nümayiş etdirdi ki, Azərbaycan müasir beynəlxalq münasibətlər sistemində balanslaşdırılmış və çoxşaxəli xarici siyasət yürüdən ölkələrdən biridir. ABŞ ilə strateji tərəfdaşlıq, Çin ilə hərtərəfli strateji əməkdaşlıq, Türk dünyası ilə inteqrasiya və Avropa İttifaqı ilə strateji xarakter daşıyan münasibətlərin paralel inkişaf etdirilməsi Prezident İlham Əliyevin həyata keçirdiyi xarici siyasət kursunun mühüm nailiyyətidir. Məhz bu siyasət nəticəsində Azərbaycan bu gün müxtəlif geosiyasi güc mərkəzləri arasında etibarlı tərəfdaş kimi qəbul olunur, regionun təhlükəsizlik, enerji və nəqliyyat arxitekturasının əsas iştirakçılarından birinə çevrilir”, - deyə media eksperti əlavə edib.
Bölmənin digər xəbərləri
