Ölkədə rəqəmsallaşma, süni intellekt və innovasiya sahələrində fəaliyyət təkmilləşdirilir ŞƏRH
Bakı, 2 iyul, AZƏRTAC
Sürətli rəqəmsallaşma mühitində süni intellekt həllərinin istifadəsinin nəzəri aspektləri qədər praktik yönlərinin də aktuallaşdığının şahidi oluruq. Çünki bu sahə birbaşa insanların həyat və fəaliyyətinə dərindən təsir edir.
Bu fikirləri AZƏRTAC-a açıqlamasında siyasi elmlər üzrə fəlsəfə doktoru, politoloq Şəbnəm Həsənova söyləyib.
O bildirib ki, iqtisadiyyatın və siyasətin bütün sahələrində rəqəmsal transformasiyanın artan tempi ilə süni intellektəsaslı metodlardan istifadəyə ehtiyac da artır. Bu gün biznes təşkilatlarının əməliyyatlarının təkmilləşdirilməsi zəruri hal alıb, eyni zamanda, biznesin bütün ölçüləri, yəni əməliyyatlar, müştəri təcrübəsi və qərarqəbuletmə prosesi əhəmiyyətli dərəcədə dəyişib.
Politoloq qeyd edib ki, məlumat təhlükəsizliyi və etik məsələlərlə bağlı ciddi problemlərin mövcud olduğu bir zamanda bu amil həm şəxsi, həm də milli təhlükəsizliklə birbaşa bağlıdır. Qeyd olunmalı məqam həm də ondan ibarətdir ki, süni intellektin inkişafı qlobal təhlükəsizliyə təsir edir.
“Dövlətlərin data mərkəzlərinin vəziyyəti, enerji imkanları və süni intellektin inkişafı birbaşa onların gücü, eləcə də qlobal təhlükəsizliyə potensial təsiri kontekstində nəzərdən keçirilir. Azərbaycan da dünya trendlərindən və mövcud çağırışlardan kənarda qalmır, bu istiqamətdə mühüm addımlar atır. Fevralın 11-də Prezident İlham Əliyevin sədrliyi ilə “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirənin keçirilməsi bu baxımdan xüsusi əhəmiyyət kəsb edir.
Dövlətimizin başçısı ölkədə rəqəmsallaşma, elektron hökumət, süni intellekt və innovasiya sahələrində fəaliyyətin təkmilləşdirilməsi ilə bağlı bəzi tədbirlər haqqında Fərman imzalayıb.
Prezident İlham Əliyev Avropa Komissiyasının Prezidenti Ursula Fon der Lyayeni qəbul edərkən bildirdi ki, Avropa Komissiyası ilə münasibətlərin kifayət qədər yeni istiqaməti bərpaolunan enerji ilə bağlıdır. Deməli, yeni sahələr üzrə də rəqəmsallaşmanın, süni intellektin və data mərkəzlərinin aktuallığı artır”, - deyə o qeyd edib.
Politoloq bildirib ki, Azərbaycanın Birinci vitse-prezidenti Mehriban Əliyevanın sədrliyi ilə Rəqəmsal İnkişaf Şurasının ilk iclasında da süni intellektin dövlətlərin təhlükəsizliyinin təmin edilməsində artan rolu xüsusi vurğulandı. Bu iclasda qarşıdakı üç il üçün rəqəmsallaşma, süni intellekt, kibertəhlükəsizlik və innovasiya ekosisteminin inkişafını təmin edən konkret yol xəritəsi üzrə tapşırıq və tövsiyələrin verilməsi Azərbaycanı proqnozlaşdırılması çətin olan risklərdən də sığortalayır.
“Azərbaycan coğrafi mövqeyini ziyanına işləyən uğursuz təcrübəyə deyil, xeyrinə işləyən reallığa çevirməyi bacarır. İllər ərzində transmilli, böyük şirkətlərlə iş təcrübəmizin olması da böyük üstünlükdür. Müsbət investisiya mühitini yaradan amillərdən biri də məhz budur.
Yeni çağırışlar mövcud reallıqlarla paralel şəkildə inkişaf edir. Bu istiqamətdə Azərbaycanın uğurunu təmin edən əsas amil beynəlxalq təcrübənin öyrənilməsi ilə yanaşı, milli maraqların da uzlaşdırılmasıdır”, - deyə Ş.Həsənova əlavə edib.
Bölmənin digər xəbərləri
