Bakı, 1 aprel, AZƏRTAC

Hüseyn Cavidin ev-muzeyində “Erməni terroru muzey fondlarında” mövzusunda elmi sessiya keçirilib.

Bu barədə AZƏRTAC-a muzeydən məlumat verilib.

Tədbirdə muzeyin direktoru filologiya elmləri doktoru Gülbəniz Babaxanlı qeyd edib ki, 1918-ci ilin mart-aprel aylarında ermənilər Bakı, Şamaxı, Quba qəzalarında, Qarabağ, Zəngəzur, Naxçıvan, Lənkəran və başqa bölgələrdə azərbaycanlılara qarşı amansız soyqırımı aktı törədiblər. Xüsusi qəddarlıqla xalqımıza qarşı həyata keçirilmiş həmin soyqırımına Ümummilli Lider Heydər Əliyevin 1998-ci il 26 mart tarixli Fərmanı ilə siyasi qiymət verilib.

Alim bildirib ki, ermənilərin azərbaycanlılara qarşı törətdikləri soyqırımı zamanı 50 mindən çox insan qətlə yetirilib. Onların arasında çoxlu azyaşlı uşaqlar və qadınlar olub. Biz tariximizə qanla yazılmış bu hadisələri heç zaman unutmamalıyıq.

G.Babaxanlı 1918-ci ilin mart ayında ermənilərin törətdiyi qırğınlar zamanı görkəmli Azərbaycan şairi və dramaturqu Hüseyn Cavidin də ölüm təhlükəsi ilə üzləşdiyini qeyd edib. Bildirilib ki, cəlladlar Hüseyn Cavidi və onunla bərabər “Təbriz” mehmanxanasında olan digər insanları da ələ keçirib, onların əksəriyyətini güllələyiblər. Hüseyn Cavid isə təsadüf nəticəsində ölümün pəncəsindən xilas ola bilib.

Sonra mövzu ilə bağlı məruzələr dinlənilib. Məruzəçilər muzeyin fondunda qorunan materiallar əsasında ermənilərin xalqımıza qarşı törətdikləri soyqırımından bəhs ediblər.

Tədbir iştirakçıları ermənilərin xalqımıza qarşı həyata keçirdikləri soyqırımı ilə bağlı təşkil edilən kitab və sənəd sərgisi ilə tanış olublar.