Ermənistan təxribatların miqyasını genişləndirməklə sərhəddə eskalasiya yaratmağa çalışır - Açıqlama
Bakı, 19 iyun, AZƏRTAC
Azərbaycanın aprelin 23-də Laçın sərhəd-keçid məntəqəsini quraşdırdıqdan sonra ermənilərin daha intensiv şəkildə ölkəmizə qarşı təxribatlar törətdiyi, o cümlədən atəşkəsi pozması və fortifikasiya qurğularını inşa etməsi diqqəti xüsusilə cəlb edir. Laçında sərhəd-keçid məntəqəsində törədilən təxribat isə birmənalı olaraq Ermənistanın Qarabağda yaşayan əhalinin Azərbaycana inteqrasiyasını əngəlləmək, bu prosesə maneə törətmək məqsədilə atılan təxribatçı addım idi. Azərbaycanın müvafiq orqanları məsələ ilə bağlı cinayət işi qaldırıblar və Laçın nəzarət-buraxılış məntəqəsindən keçid dayandırılıb. Azərbaycan baş vermiş terrorda əli olanların tapılması və məsuliyyətə cəlb olunması üçün bütün müvafiq tədbirləri gördü. Dövlət Sərhəd Xidmətinin sərhəd qoşunlarının hərbi qulluqçusunun yaralanması ilə nəticələnən təxribatın cavabını Azərbaycan sərhədçiləri artıqlaması ilə verdilər. Düşmən itkilərə məruz qaldı. Azərbaycan sərhədçisini yaralayan iki düşmən snayperi isə məhv edildi. Ermənistanın hərbi sahədə mövqeləri güclü olan bu qrup hər vəchlə sülhün bərqərar edilməsinə, ermənilərin inteqrasiyasına, bölgədə sabitliyin və təhlükəsizliyin təmin olunmasına zərbə vurmağa çalışırlar.
Bu fikirləri AZƏRTAC-a açıqlamasında hərbi ekspert Ədalət Verdiyev deyib.
Onun sözlərinə görə, son günlər davamlı olaraq həm şərti dövlət sərhədində ordumuzun mövqeləri intensiv atəşə tutulur, həm də Azərbaycanın ərazisində müvəqqəti yerləşdirilmiş Rusiya sülhməramlı kontingentinin məsuliyyət zonasında qanunsuz erməni silahlı dəstələri hərbi təxribatlar törədirlər. Göründüyü kimi, Ermənistan tərəfi bu günədək törətdiyi və eskalasiya yaratmağa cəhd etdiyi 15-ə qədər təxribatın heç birində epizodik olsa belə nəticə əldə edə bilməyib. Törədilən bütün təxribatların qarşısı qətiyyətlə alınıb. Hazırda isə Ermənistanın təxribatların miqyasını daha da genişləndirməyə, bununla da yaxın perspektivdə sərhəddə hərbi eskalasiya yaratmağa meyilli olduğu görünür. Eskalasiyanın miqyası həm Naxçıvan, həm Şərqi Zəngəzur, həm də Rusiya sülhməramlıların müvəqqəti nəzarətində olan əraziləri əhatə edə bilər. Törədilən çoxsaylı atəşkəs pozuntularının və erməni təxribatlarının əsas məqsədi sülh sazişi üzrə aparılan danışıqlar prosesinin istiqamətini, sərhəddə və ya Rusiya sülhməramlı kontingentinin müvəqqəti yerləşdirildiyi Azərbaycan ərazilərində baş verən toqquşmalara yönəltməkdir. Bununla da sülh sazişi üzrə müzakirələr prosesini ləngitmək və yubatmaq, nəticə ilə etibarilə mövcud Paşinyan hakimiyyətinin ömrünü növbəti seçkilərə qədər uzatmaqdan ibarədir. Zəngilan və Naxçıvan istiqamətində təxribatların əsas məqsədi isə Ermənistanın birgə bəyanatla üzərinə götürdüyü və Zəngilanla Naxçıvanı birləşdirəcək Zəngəzur dəhlizinin açılmasını əngəlləməkdən ibarətdir.
Ədalət Verdiyev bildirib ki, Azərbaycan baş verən proseslərə, erməni təxribatlarına mümkün olduğu qədər təmkinli yanaşmağa çalışır. Çünki Ermənistanın daha əvvəl də şərti sərhəddə törətdiyi təxribatların nəticəsinin təcavüzkar ölkə üçün nə qədər ağrı-acılı olduğu kimsədə şübhə doğurmur. Belə genişmiqyaslı eskalasiya şəraiti Ermənistan tərəfindən 2022-ci ilin sentyabrında da qəsdən yaradılmışdı. Bunun nəticəsində Azərbaycan tərəfi 10 saat ərzində təxminən altı yüzə qədər düşmən qüvvəsini məhv etmişdi, 11 strateji yüksəklik və 74 mövqe düşməndən təmizlənmişdi. Əgər Ermənistan bu təxribatlarını yenə də davam edərsə, bəlkə də ötən ilin sentyabrına bənzər hadisələrin təkrarını ərazidə yenidən izləyə biləcəyik. Bu Ermənistan hakimiyyətinin, ordusunun və ictimaiyyətini daha dərindən məyus edəcək fəaliyyətlərdən ibarət olacaq. Əgər Ermənistana bölgədə sülhün bərqərar olması lazım deyilsə, o zaman Azərbaycan da eyni mövqedən çıxış edərək Ermənistanı növbəti dəfə cəzalandırmaq məcburiyyətində qalacaq. Hazırda Azərbaycanla Ermənistan arasında gedən danışıqlar, sülh prosesinin intensivləşməsi həm Rusiyanı, həm də Ermənistandakı rusiyapərəst qüvvələri ciddi narahat edir. Bu təxribatın məhz sülh prosesinə zərbə vurmaq məqsədilə törədildiyinə yüksək əminlik var.
“Həmçinin Ermənistan 30 ildən artıq müddətdə işğal altında saxladığı torpaqlarımızda həyata keçirdiyi ekoloji terroru Naxçıvan Muxtar Respublikası ilə sərhəddə davam etdirmək niyyətindədir. Arazdəyən kəndində inşa olunan metallurgiya zavodunun illik istehsal gücü 180 min ton nəzərdə tutulub. Bu isə kifayət qədər böyük tullantı və zəhərli qaz deməkdir. Azərbaycan bu cür ekoloji cinayətə göz yuma bilməz. Lakin qarşı tərəfin Azərbaycan Ordusunun həmin ərazidə inşa olunan metallurgiya zavodu istiqamətində guya mülki əhalini atəşə tutması barədə verdiyi açıqlamalar həqiqətəuyğun deyil. Həmin ərazi gecə-gündüz ordumuzun nəzarəti altındadır və zavodun ərazisində də mülki işçilər, texnikalar fasiləsiz çalışmaqdadır. Odur ki, Ermənistan belə məlumatları yaymaqla zavodun tikintisi zamanı baş verən xoşagəlməz hadisələri Azərbaycanın adına çıxmağa və ordumuzu ləkələməyə çalışır”, - deyə hərbi ekspert vurğulayıb.
Bölmənin digər xəbərləri
