Ermənistanın işğalçılıq siyasətinə dəstək verən İran davranışları ilə özünü ifşa edir – Şərh
Bakı, 20 iyun, AZƏRTAC
İranın Azərbaycana münasibətində son vaxtlar nəzərə çarpan və narahatedici məqamlar, o cümlədən ölkəmizin İrandakı səfirliyinə hücum, məscidlərimizi viran qoyan Ermənistana dəstək İslam adına yaraşmayan haldır. Ötən il Ermənistanın Qafan şəhərində İranın baş konsulluq açması və bu ölkənin xarici işlər nazirinin orada verdiyi bəyanatlar Tehranın Azərbaycan ərazilərinin işğaldan azad edilməsi və regiondakı yeni reallıqlarla barışa bilmədiyini nümayiş etdirir. İranın bu məsələdəki mövqeyi heç anlaşılan deyil. Xatırladım ki, 44 günlük Vətən müharibəsi zamanı ordumuz Azərbaycan-İran dövlət sərhədinin 132 kilometrlik hissəsini bərpa etdi. Eləcə də əsgər və zabitlərimizin şücaət və qəhrəmanlığı sayəsində Füzuli, Cəbrayıl, Zəngilan və Qubadlı rayonları, Hadrut qəsəbəsi və Şuşa şəhəri düşməndən təmizləndi. Lakin nədənsə bu, həmçinin Laçın rayonunda sərhəd-buraxılış məntəqəmizin qurulması, Zəngəzur dəhlizinin reallaşdırılmasının gündən-günə daha aydın şəkildə ictimai müstəviyə gətirilməsi, məscidlərimizdə donuz saxlayan erməniləri öz torpaqlarımızından qovmağımız, “Dəmir yumruq”la başlarına zərbə endirməyimiz İranın xoşuna gəlmədi.
Bunu AZƏRTAC-a açıqlamasında hərbi ekspert, jurnalist İbrahim Rüstəmov deyib.
“Belə anlaşılır ki, İran Azərbaycanın müstəqilliyini, daha inkişaf etmiş iqtisadiyyata malik dövlət olmasının, silahlı qüvvələrinin güclənməsinin əleyhinədir. Yəni cənub qonşumuz Azərbaycanı güclü dövlət kimi görmək istəmir. Çünki biz İrana dindaşımız kimi, İslam ölkəsi kimi baxırıq. Çox təəssüflənirik ki, İslam mənsubları olan İran hakimiyyəti Azərbaycana qarşı münasibətdə işğalçının yanındadır. Son hadisələr də İranın mövqeyini daha açıq-aydın şəkildə ortaya qoydu. Bu mövqe işğalçının yanında olmağa xidmət edir. İranın PUA-larla Ermənistana yardım göstərməsi, eyni zamanda, bu ölkəyə göndərilən hərbi yardımın İran vasitəsilə daşınması İslam düşməninə zəhər və güc vermək anlamına gəlmir”, - deyə İbrahim Rüstəmov vurğulayıb.
Hərbi ekspertin sözlərinə görə, bu, İslama qarşı təhdiddir. Ona görə də İranın bu siyasətdə öz mövqeyini daha ciddi redaktə etməsinə ehtiyac var. Çünki Ermənistan nə qədər güc sərf etsə, səy göstərsə də, Azərbaycanın ərazi bütövlüyünü poza bilməyəcək. Belə ki, ölkəmizin bu məsələdəki mövqeyi konkretdir, realdır, çox güclüdür. Azərbaycanın gücü onun təkcə ciddi orduya malik dövlət olmasında deyil. Ən böyük gücü həqiqətlərinin beynəlxalq hüquq tərəfindən müdafiə olunmasındadır. Ona görə də xalqımız Prezident İlham Əliyevin və Türkiyə Prezidenti Rəcəb Tayyib Ərdoğanın da həmin məsələ ilə bağlı fikirlərini dəstəkləyir. Azərbaycan - Türkiyə biliyi türk dünyasını sevən insanların həmrəyliyi, işğalçıya və təhdidlərə yox deməkdir. Müasir dünyada güc faktoru önəm daşımaqdadır. Bu mövqe sülhün, asayişin qorunmasına xidmət edir. Güman edirəm ki, nə İran, nə onun kimi düşünən ölkələr, o cümlədən Fransa bu məsələdə uğur əldə edə bilməyəcək.
“Həmçinin Türkiyə Prezidenti Rəcəb Tayyip Ərdoğanın, Pakistan Baş naziri Məhəmməd Şahbaz Şərifin Azərbaycana səfəri ölkələrimiz arasında strateji müttəfiqlik, dostluq və qardaşlıq əlaqələrinin əyani təzahürüdür. Hazırkı vəziyyətdə Azərbaycanın Türkiyə və Pakistanla münasibətləri mühüm əhəmiyyət kəsb edir. Pakistan da İslam ölkəsidir, amma Azərbaycana qarşı münasibətdə obyektiv mövqe nümayiş etdirir. Pakistanla Azərbaycan arasında siyasi, iqtisadi, mədəni, enerji, hərbi və hərbi sənaye sahələri üzrə əməkdaşlıq yüksələn xətt üzrə inkişaf edir. Pakistan həmişə Azərbaycanın haqq işini dəstəkləyib və bu günədək də Ermənistanla diplomatik əlaqələr qurmayıb. Türkiyə, Pakistan, Səudiyyə Ərəbistanı kimi ölkələrin mövqeyi və yürütdükləri siyasət müsəlman aləmində əlaqələrin inkişafına, İslam dünyasının maraqlarının müdafiəsinə yönəlmiş siyasətin əyani təsdiqidir. Bundan fərqli olaraq, özünü İslam dünyasının maraqlarının müdafiəçisi kimi təqdim edən, əslində isə Ermənistanın Azərbaycana qarşı 30 il davam edən işğalçılıq siyasətinə hərtərəfli dəstək verən İran davranışları ilə özünü tam ifşa edib. Bu ölkə İslamdan yalnız öz maraqlarını inkişaf etdirmək üçün vasitə kimi istifadə etdiyini hər addımında göstərib”, - deyə hərbi ekspert bildirib.
Jurnalist vurğulayıb ki, digər tərəfdən Zəngəzur dəhlizinin açılması qaçılmazdır. Bu dəhliz nə qədər tez açılarsa, o qədər yaxşıdır. Hər halda bu istiqamətdə səylər artırılacaq. Həmin dəhlizin açılması bölgədə əməkdaşlıq məsələlərinə də müsbət təsir göstərəcək. Avtomobil və dəmir yolları ilə bağlı atılacaq addımlar sayəsində Bakıdan İqdıra getmək mümkün olacaq. Naxçıvana yolun açılması ilə Türkiyənin Naxçıvanla əlaqəsi daha da asanlaşacaq. Bu əlaqələrin yaradılması Türkiyə ilə Azərbaycan arasındakı münasibətlərin daha da güclənməsinə imkan verəcək.
Bölmənin digər xəbərləri
