ORDU
Ermənistanın Naxçıvan istiqamətində təxribatının məqsədi - ŞƏRH
![Ermənistanın Naxçıvan istiqamətində təxribatının məqsədi - ŞƏRH](/files/2023/2/1200x630/16932067991816832017_1200x630.jpg)
Bakı, 28 avqust, AZƏRTAC
Ermənistan silahlı qüvvələrinin bölmələri son zamanlar Azərbaycan Ordusunun əsasən Kəlbəcər, Xocavənd, Xocalı, eləcə də Naxçıvan Muxtar Respublikasının müxtəlif rayonları istiqamətində yerləşən mövqelərini atəşə tutur və təxribatlar törədirlər. Belə ki, avqustun 21-dən 22-dək Ermənistan ordusu Naxçıvan Muxtar Respublikasının Sədərək rayonunun Qaraağac yaşayış məntəqəsi istiqamətindəki mövqelərini müxtəlif çaplı silahlardan atəşə tutub. Bundan başqa, avqustun 25-də Ermənistan ordusuna məxsus kvadrokopter bölmələrimizin Naxçıvanın Sədərək rayonunun Heydərabad yaşayış məntəqəsi istiqamətindəki mövqeləri üzərində uçuşlar həyata keçirməyə çalışıb. Avqustun 26-da isə Ermənistan silahlı qüvvələri təxribat törətmək məqsədilə Silahlı Qüvvələrimizin Naxçıvanın Şərur rayonunun Havuş yaşayış məntəqəsi istiqamətindəki mövqelərinin qarşısında əlverişli mövqelər tutmağa cəhd ediblər. Bölmələrimiz tərəfindən qeyd olunan istiqamətlərdə cavab tədbirləri görülüb.
Bunu AZƏRTAC-a açıqlamasında “Həmvətənlərə Dəstək” İctimai Birliyinin təsisçisi, ehtiyatda olan polkovnik-leytenant, hərbi-siyasi ekspert Elmar Hüseyn söyləyib.
Onun sözlərinə görə, həmin istiqamətə xəritə üzərindən baxsaq görərik ki, Havuş yaşayış məntəqəsində dağ silsiləsi mövcuddur. Düşmən bölmələri orada yerləşən hakim yüksəkliklərin qarşısında mövqelər tutmağı planlaşdırırlar. Silahlı birləşmələrimizin ayıq-sayıqlığı nəticəsində təxribat törətmək istəyən qarşı tərəfin fəaliyyəti dərhal dayandırılıb və düşmən geri otuzdurulub. Bu göstərir ki, Ermənistan ordusu müəyyən mövqeləri ələ keçirmək niyyətindədir və bütün bu cəhdlərin qarşısı qətiyyətlə alınır. Eləcə də mütəmadi şəkildə bölmələrimizin müxtəlif istiqamətlərdə mövqelərinin qarşısında uzunmüddətli fortifikasiya qurğuları quraşdırmağa cəhd göstərirlər.
Polkovnik-leytenant qeyd edib ki, Havuş yaşayış məntəqəsi üç tərəfdən düşmənlə əhatə olunan və sərhəddə yerləşən strateji yüksəklikdir. Həmin yüksəklikdə və yaşayış məntəqəsi üzərində Şərur şəhərinin mərkəzindən keçməklə İrəvan-Naxçıvan-Bakı marşrutu yerləşir. Bu marşrutun davamı Zəngəzur dəhlizinə aparıb çıxarır. Digər ikinci istiqamət isə Şərur rayonundan keçməklə İranla Ermənistan sərhədinin ortasında mərkəz rolunu oynayır. Əgər gələcəkdə bu istiqamətdə təxribatlar törədilərsə, Azərbaycan ilə Türkiyə arasında imzalanmış Şuşa Bəyannaməsinə əsasən qardaş ölkə Qarabağdakı terrorun qarşısının alınması üçün müdaxilə edə bilər. Bu istiqamətlərdə gedən təxribatlar fonunda Ermənistan orada hərbi oyunlar təşkil edirdi. Çünki hərbi oyunlar keçirildiyi dövrdə əslində sərhəddə atəşkəs pozulmamalı idi. Ancaq buna riayət edilmədi. Beləliklə, Ermənistanın məqsədi hərbi təxribatlar törətmək idi. Eyni zamanda, ermənilər Arazdəyən kəndi yolu istiqamətində zavod inşa etməyə çalışırdılar. Yəni, bu təxribatlar bir-biri ilə əlaqədardır. Onların da qarşısı Ordumuzun qoşunları tərəfindən qətiyyətlə alındı. Həmçinin başqa istiqamət Azərbaycanın Tovuz rayonudur. Əgər Havuş kəndi istiqamətində təxribata cəhd olunsaydı, Tovuz yolu marşrutundakı hakim yüksəkliklər nəzarətə götürülərdi.
“Azərbaycanın qərb sərhədlərində, o cümlədən Havuş yaşayış məntəqəsi istiqamətində Ermənistanın altı güc strukturu hərbi oyunlar keçirib və bu oyunları Ermənistanın baş naziri Nikol Paşinyan da izləyib. Bunlar dövlətimizin başçısı, Ali Baş Komandan İlham Əliyevin avqustun 25-də Kəlbəcərə səfəri ərəfəsində həmin təlimləri başlayıblar. Avqustun 26-da təlimi bitirməklə Ermənistan ölkəmizə müəyyən mesaj göndərdi. Bu, ermənilərin əsas hədəfinin Tovuzun Qovlar yolu və Gürcüstana çıxışı olan sərhədimiz olduğunu göstərir. Bu, bizə 2020-ci ilin iyul hadisələrini, Tovuz döyüşlərini xatırladır. O vaxt həmin istiqamətdə təxribatdan sonra Silahlı Qüvvələrimiz 44 günlük Vətən müharibəsinin başlanmasına səbəb olan antiterror əməliyyatına başladı. Belə ki, İkinci Qarabağ müharibəsindən əvvəl Ali Baş Komandanımız bütün güc strukturlarını idarə edirdi və bundan əvvəl təlimlər keçirilmişdi. Paşinyan burada həmin obrazı yaratmağa çalışırdı və hakimiyyəti dövründə ilk dəfə hərbi oyunları izləməyə gəlmişdi. Ona cavab olaraq Türkiyənin müdafiə naziri Yaşar Gülər də ölkəmizə gələrək Azərbaycanın Müzəffər Ali Baş Komandanı İlham Əliyevlə və müdafiə naziri Zakir Həsənovla görüşlər keçirib”, - deyə Elmar Hüseyn vurğulayıb.
Azərbaycan Ordusunun qarşı tərəfin bütün təxribatlarının qarşısını almağa hazır olduğunu diqqətə çatdıran hərbi-siyasi ekspert deyib: “Bu ilin iyununda Müdafiə Nazirliyinin komando hərbi hissələrinin birinə Döyüş bayrağını təqdimetmə mərasimində Ali Baş Komandan İlham Əliyev Ordumuzun bütün hakim yüksəkliklərə nəzarət etməsini vurğulayaraq demişdi: “Biz Ermənistanla sərhəd boyunca əlverişli mövqelərə sahibik. Biz o mövqelərdə möhkəmlənirik. Strateji yüksəkliklərdə olmağımız bizə strateji üstünlük təmin edir. Yenə də deyirəm, biz son iki il yarım ərzində Ordumuzu böyük dərəcədə gücləndirmişik. Əgər bütün bu amilləri Ermənistan və onun arxasında dayanan xarici qohumları başa düşmürlərsə, onda günah onların boynundadır”.
Silahlı Qüvvələrimiz demək olar ki, hazırda bütün hakim yüksəklikləri ələ keçirib. Ermənistanın, ümumiyyətlə, Naxçıvan, Şərur, Sədərək rayonlarının yaşayış məntəqələri istiqamətində təxribat törətməsi düşmənin sülhdən yayınmasını göstərir. Amma Ermənistan ordusunun həmin istiqamətlərdən raket sistemlərini bölmələrimiz 44 günlük savaş dövründə məhv edib. Onların raket sistemləri olmadığı üçün orta çaplı topları həmin qarşı tərəfdə mövqelərdə yerləşdirməklə daha uzaq hədəfləri, Havuşdakı yüksəkliyi və Şərurdan keçən yolu vurmaq mümkündür. Görünən odur ki, erməni silahlıları bu istiqamətlərdə hakim yüksəkliklərə çıxmağa çalışırlar. Lakin onlar məqsədlərinə nail olmayacaqlar. Ordumuz ayıq-sayıqdır və qarşı tərəfin bütün təxribatlarının qarşısı bundan sonra da qətiyyətlə alınacaq”, - deyə Vətən müharibəsi veteranı söyləyib.