Bakı, 14 oktyabr, Elmir Səftərov, AZƏRTAC

Cənubi Qafqazda sabitliyin, sülhün, əməkdaşlığın deyil, işğalın, cinayətlərin tərəfdarı olan Ermənistan hər zaman öz mənfur niyyətləri naminə bölgədə gərginliyi daha da artırmağa çalışıb. Bu məqsədlə fürsət düşdükcə və əlverişli şərait yarandıqca öz havadarlarından aldığı dəstəklə Azərbaycan ərazilərini işğal etməklə qane olmayan Ermənistan, həmçinin azərbaycanlıları yaşamaq hüququndan da məhrum edib, onlara qarşı misli görünməmiş soyqırımlarına imza atıb. Cəzasızlıqdan və beynəlxalq hüququn işləksizliyindən istifadə edən təcavüzkar ölkə daha da irəli gedərək Azərbaycanın digər ərazilərini də işğal edəcəyini dünya ictimaiyyətinin gözü qarşısında səsləndirməkdən zərrə də olsa çəkinməyib. Beynəlxalq hüquq normalarının yox, gücün əsas olduğu dünyada Azərbaycan Ermənistana göstərilən hərtərəfli dəstəyə baxmayaraq, tarixi ədaləti öz gücünə bərpa etdi.

Mövzu barədə fikirlərini AZƏRTAC-la bölüşən politoloq Ramiz Alıyev deyib ki, xarici təhdidlərə sinə gərmək, ölkənin ərazi bütövlüyünü qorumaq, separatizmin kökünü kəsmək hakimiyyətin xalq qarşısında götürdüyü son dərəcə vacib öhdəliklərdən hesab olunur. Hər bir iqtidar bu öhdəliklərə sadiq qalmalı, hansısa kənar təzyiqlər qarşısında geri çəkilməməli və kompromisə getməməlidir. Biz bu xüsusiyyətləri, mətinliyi Azərbaycan hakimiyyətinin timsalında görmüşük və hazırda da bunu müşahidə edirik. Ən çətin, çıxılmaz məqamlarda belə xarici dövlətlərin, beynəlxalq təşkilatların güclü təzyiqinə ciddi müqavimət göstərərək ərazi bütövlüyü məsələsində güzəştli sülhə getməyən ölkə rəhbərliyi bu gün Ermənistan dövlətinin, separatçıların ağır cinayət əməllərini, xislətlərini unutmayaraq “dəmir yumruğ”u hazır vəziyyətdə saxlayır. Müharibədə ağır məğlubiyyətə uğramalarına, yalvararaq kapitulyasiya aktı imzalamalarına baxmayaraq, dövlətimiz erməni canilərinin göz yaşlarına inanmır, onların cəzalandırılması üçün mübarizəsini davam etdirir.

“Bu gün özünü dünyaya demokrat, sülh göyərçini kimi təqdim edən, velosiped sürərək guya ekologiyanın dostu olduğunu hər fürsətdə gözə soxan Nikol Paşinyanın əslində mələk cildinə girmiş şeytan olduğunu unutmamalıyıq. Təəssüf ki, Azərbaycanda da N.Paşinyan sevdalı radikal ünsürlərə rast gəlinir. Belələri erməni baş naziri müdafiə etmək üçün Nikol Paşinyan barədə “Azərbaycanın ərazi bütövlüyünü tanıyır”, “bizə qarşı heç bir ərazi iddiası yoxdur”, “torpaqlarımızın işğalında şəxsən iştirak etmiş keçmiş prezidentlərə qarşı amansızdır”, “tezliklə sülh müqaviləsi bağlamaq istəyir” kimi “arqumentlər” səsləndirirlər. Dar siyasi dünya görüşü olan, tarixi yaddaşsızlıqdan əziyyət çəkən, yalnız gündəmin diktəsi ilə cəfəng siyasi mülahizələr irəli sürən belələrinə bir neçə faktı çatdırmaq istəyirəm. N.Paşinyan həmin baş nazirdir ki, “Qarabağ Ermənistandır, nöqtə” deməklə münaqişənin siyasi və diplomatik həllinə olan bütün inam və ümidlərin üstündən xətt çəkdi. Cıdır düzündə yallı gedən, Cəbrayıla yol çəkən N.Paşinyanın avantürist çıxışları müharibəni qaçılmaz etdi. Ermənistanın sabiq müdafiə naziri olmuş David Tonoyan adlı biri yeni ərazi iddiaları ilə çıxış edirdi. Onlar Mingəçevir Su Elektrik Stansiyasını partlatmaqla bizi hədələyirdilər. Ölkəyə rəhbərlik edən insanların bu cür məsuliyyətsiz açıqlamalar verməyə haqları yoxdur və belələri heç vaxt bağışlanılmır. Məhz Paşinyanın əmri ilə Bərdə, Gəncə raketlə vuruldu. Baş nazir və onun komandasının Azərbaycana qarşı ərazi iddiası yox idisə, nə üçün Qarabağda Ordumuza qarşı hərbi müqavimət göstərirdi? Nə üçün müharibənin elə ilk günündə kapitulyasiya aktı imzalamadı? Ali Baş Komandan İlham Əliyev dəfələrlə bəyan etmişdi ki, əgər Ermənistan müharibənin dayanmasını istəyirsə, söz versin ki, dəqiq vaxt qrafiki üzrə torpaqlarımızı boşaldacaq. Amma onlar bunu etmədilər”, - deyə R.Alıyev bildirib.

O qeyd edib ki, hazırda Bakıda cəza çəkən Qarabağdakı erməni separatçılarının rəhbərlərinin də cinayət əməllərinə göz yummaq olmaz. Xarici dövlətlərin, beynəlxalq təşkilatların hərbi əsir kimi təqdim edərək onlara azadlıq tələb etmələri riyakarlıqdır, qatı cinayətkarları dəstəkləməkdir, beynəlxalq hüquqa hörmətsizlikdir. Azərbaycan 2020-ci il müharibəsindən sonra humanitar jest olaraq saxlanılan 200 nəfərdən artıq ermənini azad edib. Onlarla Cenevrə konvensiyalarının tələblərinə uyğun şəkildə rəftar edilib. Həbsdə qalan müharibə cinayətkarları, separatçı liderlər etnik təmizləmə, hərbi təcavüz, işgəncə və digər ağır cinayətlərdə ittiham olunublar. Azərbaycan qoşulduğu beynəlxalq konvensiyalar üzrə bu kimi cinayətlərin araşdırılması və mühakiməsi üzrə hüquq və öhdəliklərə malikdir. Hətta onlar hərbi əsirlər olsa da törətdikləri əməllərə gözə cəzalandırılmalıdır. Ermənistanın prezidentləri Levon Ter-Petrosyan, Robert Köçəryan, Serj Sarkisyan, baş nazir Nikol Paşinyan və komandalarının, eləcə də Bakıda həbsdə olan Arkadi Qukasyan, Bako Saakyan, Araik Arutyunyan, Ruben Vardanyan və digərlərinin əlləri Azərbaycan xalqının qanına batıb. Onların cinayət əməllərini saymaqla bitməz. Azərbaycanda elə bir rayon, qəsəbə, kənd, nəsil, ailə yoxdur ki, erməni separatizminin cinayət əməllərindən əziyyət çəkməsin. Hər kəsin ya ailəsində, ya nəslində, ya da qonşuluğunda Qarabağda ermənilər tərəfindən qətlə yetirilmiş şəhid var, şikəst edilmiş qazi yaşayır. Hər bir rayonda Şəhidlər xiyabanı salınıb. Onlar erməni separatizminin qurbanlarıdır. Qarabağ və Şərqi Zəngəzurdakı yaşayış məskənləri yerlə bir edilmişdi, bəzi rayonlarda bir dənə də salamat tikili qoymamışdılar. Bəs bütün bu iyrənc, ağır cinayət əməllərinə görə kim cavab verməlidir? Biz dövlət və xalq olaraq Ermənistanın siyasi və hərbi rəhbərlərinin “sülh açıqlamalarına”, həbsdəki separatçıların “göz yaşlarına” və xarici dövlətlərin, beynəlxalq təşkilatların “humanist çağırışlarına” inanmamalı və məhəl qoymamalıyıq.

Hərbi ekspert Azər Bayramov AZƏRTAC-a açıqlamasında deyib ki, Azərbaycan torpaqlarını 30 il ərzində işğalda saxlayan Ermənistan hərbi-siyasi rəhbərliyinin riyakarlığı bununla bitmirdi. İkinci Qarabağ müharibəsindən əvvəl Ermənistanın baş naziri və digər rəsmiləri ölkəmizə qarşı yeni ərazi iddialarının, yeni işğal planlarının olduğunu açıq-aydın göstərirdilər. Hətta bir az da irəli gedən Ermənistanın sabiq müdafiə naziri David Tanoyan ABŞ-da bəyan etmişdi ki, “biz Azərbaycandan yeni ərazilər işğal etmək üçün yeni müharibəyə başlayacağıq. Bu açıqlamalar bütün qırmızı xətləri keçməyin, eyni zamanda, ATƏT-in Minsk qrupunun 30 il ərzində heç bir işə yaramayan fəaliyyətinin bariz nümunəsi idi.

Ekspert bildirib ki, Ermənistan hər zaman ölkəmizi mülki obyektləri vuracağı ilə təhdid etməsinə baxmayaraq, bu dövlətə beynəlxalq ictimaiyyət tərəfindən təzyiq və ya hər hansı sanksiyaların tətbiq olunduğunun şahidi olmadıq. Halbuki, İrəvan müharibə qanunlarına zidd şəkildə mülki əhaliyə qarşı fürsət düşdükcə soyqırımları törədib, onları yaşamaq hüququndan məhrum edib.

“Ermənistan öz mənfur niyyətini Vətən müharibəsi dövründə də davam etdirərək savaş bölgəsindən kənarda yerləşən obyektləri, mülki infrastrukturu da hədəf aldı. Əslində, Ermənistan Azərbaycan Silahlı Qüvvələri qarşısında məğlubiyyətinin qacılmaz olduğunu anladığı üçün, ordumuzda, xalq arasında ruh düşkünlüyü yaratmaq məqsədilə bu cür çirkin addımları atdı. Lakin Ermənistan Azərbaycan Ordusu tərəfindən 44 gündə diz çökdürüldü, ərazi bütövlüyümüz və dövlət suverenliyimiz təmin edildi. Həmçinin uzun illərdir ərazilərimizdə kök salan separatizmin kökü kəsildi, bütün qanunsuz silahlı birləşmələr torpaqlarımızdan çıxarıldı. Bundan sonra da əgər Ermənistan tərəfindən ölkəmizə qarşı hər hansı bir təhdid baş verərsə, Azərbaycan bütün bu mənfi çağırışların qarşısını almaq gücündə və iqtidarındadır”, - deyə A.Bayramov vurğulayıb.

“Tərxis Olunmuş Hərbçilərin Gəncləri Maarifləndirmə” İctimai Birliyinin sədri, hərbi ekspert Emin Həsənli isə AZƏRTAC-a açıqlamasında qeyd edib ki, Ermənistan hakimiyyətinin tarix boyu çirkin niyyətləri olub. Onlar nə çar, nə bolşevik Rusiyası, nə də son dövrlərdə Azərbaycana qarşı torpaq iddialarından əl çəkməyiblər, işğalçılıq və soyqırımı siyasətini həyata keçirməyə davam ediblər. Eyni siyasət xəttini davam etdirən Nikol Paşinyan da hakimiyyətə gəldikdən sonra sərsəm bəyanatlar verməyə başladı. Yeni işğal planlarını gizlətməyən Ermənistan rəsmiləri hətta Gəncəyə, Kür çayına qədər olan ərazilərə dair iddialarını səsləndirirdilər. Eyni zamanda, Mingəçevir Su Elektrik Stansiyasını, neft kəmərlərini vuracaqlarını da bəyan edirdilər. Hətta müharibə dövründə bu istiqamətdə cəhdlər də oldu. Gəncənin, Bərdənin, Tərtərin bombalanması, Mingəçevir istiqamətində raket zərbələri endirilməsi bunların bariz nümunəsidir.

“Ermənistan Azərbaycana vurduğu zərəri ödəməli, Robert Koçaryan, Serj Sarkisyan kimi cinayətkarları ölkəmizə təhvil verməlidir. Həmçinin Ermənistan konstitusiyasında dəyişikliklər edilməli, Zəngəzur dəhlizi açılmalı, digər kəndlər də Azərbaycana qaytarılmalıdır”, -deyə E.Həsənli vurğulayıb.