Estoniya parlamentinin Azərbaycanla parlamentlərarası əlaqələr üzrə deputat qrupu cəbhədəki vəziyyətlə bağlı bəyanat yayıb
Tallin, 2 oktyabr, AZƏRTAC
Estoniya parlamentinin Azərbaycan ilə parlamentlərarası əlaqələr üzrə deputat qrupu çox sayda günahsız insanın həlak olduğu Dağlıq Qarabağda Ermənistanla Azərbaycan arasında hərbi münaqişənin gərginləşməsini dərin narahatçılıqla izləyir.
AZƏRTAC xəbər verir ki, qrupun bununla bağlı bəyanatında deyilir: “Biz münaqişənin beynəlxalq hüququn norma və prinsiplərinə uyğun həll edilməsinin tərəfdarıyıq. Biz regionun bütün dövlətlərinin suverenliyinə, ərazi bütövlüyünə və beynəlxalq səviyyədə tanınmış sərhədlərinin toxunulmazlığına tam dəstəyimizi ifadə etməkdə davam edirik. Eyni zamanda, biz hazırkı vəziyyətin ciddiliyini nəzərə alaraq tərəfləri hərbi əməliyyatları dayandırmağa, atəşkəsi bərpa etməyə və ATƏT-in Helsinki Yekun Aktına və onun yerinə yetirilməsi ilə bağlı elementlərə əsaslanan Minsk qrupunun vasitəçiliyi ilə yenidən danışıq masasına qayıtmağa çağırırıq. Dağlıq Qarabağ münaqişəsinin sülh yolu ilə həll edilməsinə yeni təkan vermək bütün regionun sabitliyi və inkişafı üçün çox vacibdir”.
Asiman Əsədov
AZƏRTAC-ın xüsusi müxbiri
Tallin
Bölmənin digər xəbərləri
