“EurActiv” nəşrində Azərbaycanın Avropa İttifaqı üçün strateji tərəfdaş kimi əhəmiyyəti vurğulanıb
Bakı, 8 dekabr, AZƏRTAC
Avropanın nüfuzlu “EurActiv” nəşrində ABŞ Azərbaycanlıları Şəbəkəsinin həmsədri Yusif Babanlının “Avropa İttifaqı Türkiyəyə münasibətdə sərt mövqeyinə son qoymalıdır” sərlövhəli məqaləsi dərc olunub. Məqalədə xüsusən özünü “İŞİD” adlandıran terrorçu qruplaşmanın fəaliyyəti nəticəsində Yaxın Şərqdə yaranan qeyri-sabitliyin artdığı bir dövrdə Avropa İttifaqının Türkiyəyə ə qeyri-adekvat münasibətindən söz açılır.
Müəllif yazır ki, Aİ Türkiyənin Avropa İttifaqına üzvlüyü məsələsində mövqeyini yenidən nəzərdən keçirməli və bu ölkəyə, habelə tərəfdaş olan digər müsəlman dövlətlərinə münasibətdə ikili standartlardan imtina etməlidir.
Türkiyə qitənin enerji təhlükəsizliyinin təmin olunmasında Aİ-yə kömək etmək üçün nadir imkanlara malikdir. O, təkcə Bakı-Tbilisi-Ceyhan (BTC), Bakı-Tbilisi-Ərzurum (BTƏ) və planlaşdırılan Transanadolu qaz kəməri kimi enerji layihələrində iştirak etmir, həm də Suriya və İraq ilə həmsərhəd olmasına baxmayaraq, təhlükəsizlik sahəsində tərəfdaşdır. Müəllif yazır ki, Türkiyənin Aİ-yə üzv qəbul edilməsi Yaxın Şərqdə təhlükəsizliyə təhdidlərin aradan qaldırılması sahəsində əməkdaşlığı genişləndirəcək.
Türkiyə Avropa ilə tərəfdaş olan digər müsəlman ölkələri, o cümlədən Mərkəzi Asiya dövlətləri, habelə enerji ehtiyatları ilə zəngin Azərbaycan arasında da körpüdür. Müstəqilliyini 1991-ci ildə bərpa edən Azərbaycan üçün Türkiyə əsas tərəfdaşdır. Müdafiə sahəsində onlarca saziş imzalayan Azərbaycan ilə Türkiyə iqtisadiyyat və mədəniyyət sahəsində əməkdaşlığı davam etdirirlər. Azərbaycan Əfqanıstan, İraq və Kosovoda sülhməramlı missiyalarda iştirak etməklə bərabər, terrorizmə qarşı mübarizə aparmaq üçün öz hava məkanını Birləşmiş Ştatlara açan ilk ölkələrdən biri olub.
Eyni zamanda Azərbaycanın təbii ehtiyatlarla zəngin olan bir ölkə kimi də Aİ üçün əhəmiyyəti gündən-günə artır. Azərbaycan BTC boru kəmərini inşa etmək və oxşar layihələri planlaşdırmaqda davam etməklə, son on ildə Avropanın enerji təhlükəsizliyinin təmin olunmasına əhəmiyyətli töhfə verib. Məsələn, 2019-cu ildə işə salınacaq Transanadolu qaz kəməri ilə Avropa bazarlarına qaz nəql olunacaq, Aİ-nin vahid təchizatçıdan asılılığı təkcə enerji mənbələrinin şaxələndirilməsi və alternativlərin yaradılması hesabına azaldılacaqdır.
Aİ üçün strateji əhəmiyyət daşımalarına və demokratik islahatlar keçirmələrinə baxmayaraq, Türkiyə ilə Azərbaycan Avropa və ABŞ KİV-ləri tərəfindən əsassız tənqid olunur. Türkiyənin Aİ-yə üzvlüyü müsəlman dünyasına müsbət siqnal olacaq və göstərəcək ki, Avropa onun enerjiyə tələbatının təmin olunması çərçivəsindən kənara çıxan bir əməkdaşlıqda maraqlıdır.
Bölmənin digər xəbərləri
