“Evening Standard Theatre Awards-2023” mükafatının qaliblərinin adları açıqlanıb
Bakı, 22 noyabr, AZƏRTAC
“Evening Standard Theatre Awards” teatr mükafatının builki qaliblərinin adları açıqlanıb. Londonun “The Evening Standard” qəzeti tərəfindən təqdim olunan mükafat Böyük Britaniyanın qocaman teatr mükafatıdır.
Mərasimin əsas mükafatına - “Best Play” nominasiyasına Cek Tornun yazdığı “Motiv və replika” pyesi layiq görülüb. Əsərdə 1964-cü ildə “Hamlet”in Brodvey teatrının quruluşundakı tarixçədən söhbət açılır.
“Best Musical” nominasiyasında “Bric” teatrının “Oğlanlar və kuklalar” (Frenk Lesser, 1950-ci ildə yazdığı müzikl) tamaşası qalib adını qazanıb. Ceymi Lloyd isə Endryu Lloyd Uebberin “Sanset bulvarı” tamaşasına görə ən yaxşı rejissor nominasiyasının qalibi olub.
Amerikalı müğənni və “Pussycat Dol” qrupunun solisti Nikol Şerzinger “Sanset bulvarı”nda baş rolun ən yaxşı musiqili ifasına görə mükafat alıb.
İrlandiyalı aktyor Endryu Skott “Vanya” monotamaşasında ən yaxşı kişi rolu mükafatını qazanıb. O, Anton Çexovun “Vanya əmi” klassik pyesindəki bütün personajları oynayır.
Petsi Ferran və Ancana Vasan ən yaxşı qadın rolu nominasiyasında “Natasha Richardson Award” mükafatına layiq görülüblər.
İki xüsusi “Editors Awards” təqdim olunub. Birincisinə “İkinci qadın” 24 saatlıq şouya görə Rut Uilson, digərinə Böyük Britaniyada musiqili teatrla çoxillik əməkdaşlığa görə Elton Con layiq görülüb.
“Most Promising Playwright” (çox ümidverici dramaturq) nominasiyası Aysli Linnə onun “Gözəllik” pyesinə görə verilib. Corciya Lou isə “Sezuandan olan xeyirxah adam” quruluşuna görə “Slick, Kitsch and Buckets of Fun” mükafatını qazanıb.
Bölmənin digər xəbərləri
