Fəridə Əzizova: Azarkeşlərimizin Avropa Oyunlarının yarışlarına gəlməsini və bizə dəstək olmasını gözləyirəm
Bakı, 10 iyun, Məmməd İsayev, AZƏRTAC
Birinci Avropa Oyunları yaxınlaşdıqca Azərbaycanın bütün idman federasiyaları hazırlıq səviyyəsini artırır, yarışlarda iştirak edəcək atletlərimiz məşqləri intensivləşdirirlər. Tarixdə ilk dəfə keçiriləcək Avropa Oyunlarında taekvondoçularımız da qələbə qazanmağa iddialıdırlar. Yarışların ölkəmizdə keçirilməsi idmançılarımızın məsuliyyətini daha da artırır. “Bakı-2015” birinci Avropa Oyunlarının taekvondo yarışlarında Azərbaycanın idman şərəfini səkkiz atlet qoruyacaq.
Dörd kişi və dörd qadın idmançının daxil edildiyi taekvondo üzrə Azərbaycan milli komandasının heyətində dünya və Avropa çempionatlarının mükafatçısı Fəridə Əzizova da yer alıb. Avropa Oyunlarında çəkisi 67 kiloqramadək olan qadınların yarışında ölkəmizi təmsil edəcək taekvondo üzrə yığma komandamızın üzvü, 2012-ci ildə keçirilən London Olimpiadasının iştirakçısı Fəridə Əzizova turnirin böyük əhəmiyyət daşıdığını vurğulayaraq uğur qazanmaq üçün ciddi hazırlıq prosesi keçdiklərini deyib.
F.Əzizova AZƏRTAC-a məxsusi müsahibəsində fikirlərini bölüşərək bildirib ki, komanda olaraq yarışa böyük səylə hazırlaşırıq. Birinci Avropa Oyunları özümü təsdiqləmək baxımından yaxşı şansdır. Bu mötəbər idman yarışı doğma divarlar arasında keçirildiyi və ilk dəfə təşkil edildiyi üçün böyük əhəmiyyətə malikdir. Hər bir Azərbaycan idmançısı kimi mən də çalışacağam ki, Vətənimizi Avropa Oyunlarında layiqincə təmsil edib, yaxşı nəticələr qazanım. Bakıya gələcək rəqiblərimin çoxunu tanıyıram və onlarla əvvəllər döyüşmüşəm. Məsələn, Rusiya, Türkiyə, Fransa və İsveçrə idmançılarını tanıyıram. Fransa idmançısı 2013-cü ilin dünya çempionudur, İsveç idmançısı isə hazırda reytinqdə birinci yerdədir.
F.Əzizova qeyd edib ki, Avropa Oyunlarının Bakıda keçirilməsi məsuliyyətimizi daha da artırır. Çünki Azərbaycan xalqı, valideynlərimiz, yaxınlarımız bizi izləyəcək. Azarkeşlər bizi dəstəkləyəcək və həm onlar, həm dövlətimizin başçısı, həm Azərbaycan Taekvondo Federasiyasının rəhbərliyi bizdən yaxşı nəticələr gözləyəcək. Biz də Avropa Oyunlarında yaxşı çıxış edib, göstərilən etimadı doğrultmaq istəyirik.
Avropa Oyunları taekvondo idman növünün təbliği üçün də mühüm əhəmiyyət kəsb edir. Bu idman növünü daha da tanıtmaq üçün azarkeşlərimizin bu oyunlara gəlməsini, izləməsini və bizə dəstək olmasını gözləyirəm. Çünki taekvondo maraqlı bir idman növüdür. Eyni zamanda, Azərbaycan idmançısı kimi xalqımızın dəstəyinə çox böyük ehtiyacımız var.
F.Əzizova vurğulayıb ki, Rusiyada keçirilən dünya çempionatından qayıtdıqdan sonra səhvləri üzərində ciddi işləyir və onları aradan qaldırmağa çalışır. O deyib: “Rəqiblərimin və döyüşlərin videoçəkilişlərini izləyir, çatışmayan cəhətlərimin üzərində işləyirəm. Dünya çempionatındakı uğursuzluğumu birinci Avropa Oyunlarında mübarizəmlə unutdurmağa çalışacağam. Avropa Oyunlarına hazırlığı uzun müddətdir başlamışıq. Müxtəlif turnirlərdə, dünya çempionatında iştirak etmişəm. Ancaq hər bir yarışa xüsusi hazırlaşırıq. Avropa Oyunlarına isə ciddi və intensiv hazırlaşırıq. Avropa Oyunları ilk dəfə ölkəmizdə keçirilir. Bu oyunlar, həmçinin ölkəmizin təbliği üçün çox böyük bir şansıdır. Təlim-məşq toplanışları yüksək səviyyədə keçir və uğurlu çıxışımıza ümid edirəm. Avropa Oyunlarında ən yüksək nəticə qazanmağı hədəfləmişik. İnşallah, Oyunlarda üçrəngli bayrağımızı dalğalandıracağıq”.
Avropa Oyunlarında taekvondo yarışlarında xalların hesablanmasında elektron baş və bədən qoruyuculardan istifadə olunacağını deyən F.Əzizova son dünya çempionatında bu qoruyucularla döyüşdüklərini söyləyib. O, diqqətə çatdırıb ki, müasir texnologiya sayəsində hakimin xalın hesablanması işinə cəlb olunması maksimum səviyyədə məhdudlaşır. Artıq hakimlər yalnız bəzi fırlanma və yumruq zərbələrinə xal verə bilər. Amma artıq başqa müdaxilə olmur. Yəni hansı idmançı güclüdürsə, həmin idmançı da qalib gəlir.
Taekvondo yarışları dörd gün ərzində - iyunun 16-19-da “Baku Crystal Hall”da keçiriləcək. “Bakı-2015” birinci Avropa Oyunlarında Azərbaycan taekvondoçuları səkkiz çəki dərəcəsində güclərini sınayacaqlar. Yarışlarda ümumilikdə 128 kişi və qadın idmançı birincilik uğrunda mübarizə aparacaq.
Bölmənin digər xəbərləri
