Fevralın 10-da Bakıda temperatur iqlim normasından 4.3° aşağı olub
Bakı, 11 fevral, AZƏRTAC
Ekologiya və Təbii Sərvətlər Nazirliyinin Milli Hidrometeorologiya Xidmətinin məlumatına əsasən ölkə ərazisində müşahidə olunan yağıntılar fevralın 11-i gecə saatlarından etibarən dayanıb.
Xidmətdən AZƏRTAC-a bildirilib ki, qar örtüyünün hündürlüyü Qaxda 44, Ağdərədə (Ordubad) 27, Şəkidə 22, Xaltanda 14, Qusar, Qrızda 11, Gədəbəydə 8, Qubada, Yardımlıda, Zaqatala, Şahbuz, Oğuzda, Qobustanda 5 santimetr olub.
Daşkəsən, Göygöl, Naftalan, Gəncə, Şəmkir, Balakən, Şəki, Qax, Şamaxı, Qobustan, Göyçay, Lerikdə duman müşahidə olunub, görmə məsafəsi 50-200 metrədək məhdudlaşıb.
Fevralın 10-da havanın minimal temperaturu Bakıda iqlim normasından 4.3° aşağı olub. Belə ki, havanın minimal temperaturu Bakıda və Abşeron yarımadasında 2°-dək isti, Naxçıvanda 12°-dək şaxta, dağlıq rayonlarda 15-20° şaxta, aran rayonlarında 2°-dək şaxta təşkil edib.
Fevralın 12-13-də ölkə ərazisində hava şəraitinin sabit olacağı, əsasən yağmursuz keçəcəyi gözlənilir. Lakin fevralın 13-ü axşam qısamüddətli yağıntılı olacağı, dağlıq ərazilərdə qar yağacağı, qərb küləyinin arabir güclənəcəyi proqnozlaşdırılır.
Bölmənin digər xəbərləri
