FHN-in İdman-sağlamlıq klubunda çoxnövçülük üzrə çempionata yekun vurulub
Bakı, 18 aprel, AZƏRTAC
Aprelin 16-18-də Fövqəladə Hallar Nazirliyinin (FHN) İdman-sağlamlıq klubunun idman bazasında qurumlar arasında çoxnövçülük üzrə çempionat keçirilib.
Nazirliyin mətbuat xidmətindən AZƏRTAC-a verilən məlumata görə, FHN-in qurumlarının ümumilikdə 14 komandasından 60-a yaxın əməkdaşın iştirak etdiyi birincilikdə idmançılar 100 və 1000 metr məsafəyə qaçış, daşqaldırma və turnikdə dartınma növlərində həm şəxsi, həm də komanda hesabında qüvvələrini sınayıblar.
Tədbirin bağlanış mərasimində Dövlət Himni səsləndirilib.
FHN-in İdman-sağlamlıq klubunun rəisi polkovnik Füzuli Musayev çıxış edərək yarışda qalib gələn komandaları və əməkdaşları təbrik edib, onlara gələcək yarışlarda uğurlar arzulayıb. Çıxışlarda FHN-in əməkdaşlarının dövlət qurumları arasında keçirilən müxtəlif idman yarışlarındakı uğurlarından bəhs edilib.
Çempionatda uğur qazanmış komandalar və iştirakçılar təltif olunublar.
Üç gün davam edən yarışda Bakı Regional Mərkəzinin komandası bütün rəqiblərinə qalib gələrək komanda hesabında birinci olub. İkinci yerə Dövlət Yanğından Mühafizə Xidmətinin, üçüncü yerə isə Mülki müdafiə qoşunlarının komandası çıxıb.
Şəxsi yarışlarda çempion adını FHN-in Akademiyasının kursantı Murad Balayev qazanıb. İkinci yerə Xüsusi Riskli Xilasetmə Xidmətinin əməkdaşı Pirim Abbasov, üçüncü yerə isə Kiçikhəcmli Gəmilərə Nəzarət və Sularda Xilasetmə Dövlət Xidmətinin əməkdaşı Orxan Şahgəldiyev sahib olub.
Qaliblərə İdman-sağlamlıq klubunun təsis etdiyi kubok, diplom, medal və hədiyyələr təqdim olunub.
Bölmənin digər xəbərləri
