FİFA PREZİDENTİNƏ BƏDƏN TƏRBİYƏSİ VƏ İDMAN AKADEMİYASININ FƏXRİ DOKTORU ADI VERİLMİŞDİR
AZƏRTAC xəbər verir ki, oktyabrın 17-də Dövlət Bədən Tərbiyəsi və İdman Akademiyasında FİFA-nın prezidenti Yozef Blatter və UEFA-nın rəhbəri Mişel Platini iIə görüş keçirilmişdir.
Tədbirdə çıxış edən akademiyanın prorektoru Qəhrəman Məmmədyarov FİFA prezidentinin futbol aləmində çox tanınmış şəxsiyyət olduğunu, ömrünün böyük bir hissəsini bu idman növünün təbliği və inkişafı işinə həsr etdiyini bildirmişdir. Yozef Blatterin Azərbaycan futbolu ilə də sıx əməkdaşlıq etdiyini deyən Q.Məmmədyarov, onun ölkə futbolunun inkişafındakı xidmətlərini yüksək qiymətləndirmişdir.
Bədən Tərbiyəsi və İdman Akademiyası futbol kafedrasının müdiri Rafiq Bağırov Y. Blatterin Prezident İlham Əliyevin Sərəncamı ilə “Şöhrət” ordeni ilə təltif olunduğunu xatırlatmışdır. Natiq daha sonra demişdir ki, Azərbaycan futbolunun inkişafındakı xidmətləri nəzərə alınaraq elmi şuranın qərarına əsasən o, akademiyanın fəxri doktoru adına layiq görülmüşdür.
Fəxri doktor adına layiq görüldüyünə və ona göstərilən diqqət və qayğıya görə minnətdarlığını bildirən Y.Blatter, ömrünün 32 ilini dünyada futbolun inkişafına və təbliği işinə həsr etdiyini vurğulamışdır. Qonaq futbolun insanlara və bütövlükdə cəmiyyətə faydasından danışmışdır.
Bölmənin digər xəbərləri
