Filarmoniyada 15 nömrəli musiqi məktəbinin növbəti konserti Fikrət Əmirovun 100 illiyinə həsr olunub
Bakı, 24 dekabr, AZƏRTAC
Müslüm Maqomayev adına Azərbaycan Dövlət Akademik Filarmoniyasında Bakı Şəhər Mədəniyyət Baş İdarəsinin Rauf Hacıyev adına 15 nömrəli onbirillik musiqi məktəbi şagirdlərinin dahi bəstəkar Fikrət Əmirovun 100 illiyinə həsr olunmuş konserti keçirilib.
AZƏRTAC xəbər verir ki, konsert Prezident İlham Əliyevin tanınmış ictimai xadim, Xalq artisti, Dövlət mükafatları laureatı Fikrət Əmirovun 100 illiyinin qeyd edilməsi haqqında Sərəncamına uyğun olaraq təşkil edilib.
Konsertdə məktəbin peşəkar müəllimləri Tamilla Məmmədova, Svetlana Əliyeva, Ulduz Məmmədova, Ülviyyə Babayeva, Fərid Quliyev və Nigar Quliyevanın şagirdləri Cəmil Sədizadə, Əbdüləli Hüseynli, Orxan Hüseynov, Mixail Çernyavko, Hüseynağa Cəfərzadə, Əbdülqadir Əzizzadə, Lalə Nəcəfova, Samirə Cəfərli, Mərziyyə Abukəjdərova, Zərintac Qurbanzadə, Məryəm İbadova, Nazlı Mustafayeva, Həsən Hüseynov, Ömər Hüseynzadə, Ləman Kərimli və Cavid Babayev çıxış edib. Konsert zamanı şagirdləri Xalq artisti Fəxrəddin Kərimovun baş dirijor olduğu Qara Qarayev adına Azərbaycan Dövlət Kamera Orkestri müşayiət edib. Proqramda dahi bəstəkar Fikrət Əmirovun “Fantaziya”, “Bulaq başında”, “Elegiya”, “Rəqs”, “1001 gecə” baletindən “Oxatanların rəqsi”, “Sevgi rəqsi” “Noktürn”, “Lirik rəqs”, “Kor ərəbin mahnısı”, Sevil operasından “Vals”, “Aşıqsayağı”, “Şur” simfonik muğamı əsərləri yer alıb.
Konsert proqramında Bəstəkarlar İttifaqının üzvü, musiqişünas, musiqi tənqidçisi, Əməkdar incəsənət xadimi, professor Zümrüd Dadaşzadə Fikrət Əmirovun zəngin, geniş və rəngarəng yaradıcılığından söz açıb. O, həmçinin bildirib ki, çıxış edən şagirdlərin kifayət qədər yaradıcılıq təcrübəsinə malik olduqları açıq-aydın görünür: “Mütəmadi olaraq konsertlərdə simfonik və kamera orkestri ilə çıxış edən şagirdlər səhnədə sərbəst və rahatdırlar. Konsert iştirakçılarından Prezident təqaüdçüsü, beynəlxalq müsabiqələr laureatı Cəmil Sədizadə Rusiya, İspaniya, Fransa, İtaliya və Gürcüstanda keçirilən müsabiqələrin qalibidir. O, Moskvada Kreml sarayının Qeorgiyev zalında keçirilən “Nəsillərin melodiyası” festivalında Rusiya Federasiyasının prezident orkestri ilə çıxış edib. Digər iştirakçı, beynəlxalq müsabiqələr laureatı Əbdüləli Hüseynli ötən il uğurlu səhnə fəaliyyətinə görə Mədəniyyət Nazirliyi tərəfindən fəxri fərmanla təltif olunub. O, təhsil aldığı illərdə ICESCO-nun, eləcə də Gənclər və İdman Nazirliyinin dəstəyi ilə təşkil edilən İslam dünyası gənc klassik musiqi ifaçılarının VII Beynəlxalq festival müsabiqəsinə qatılıb. İspaniya, Rusiya, Gürcüstan və digər ölkələrdə keçirilən müsabiqələrin qalibi olub. VII sinif şagirdi Samirə Cəfərli isə İspaniya, Rusiya, Qazaxıstan və Gürcüstanda təşkil edilən müsabiqələrin qalibidir. Zərintac Qurbanzadə ilə Orxan Hüseynli isə İspaniya, İtaliya və Rusiyada keçirilən müsabiqələrdə laureat adı qazanıb”.
Konsertlə bağlı Rauf Hacıyev adına 15 nömrəli onbirillik musiqi məktəbinin direktoru Sevil Ələkbərova deyib ki, bu, bəzi şagirdlərin böyük səhnədə, həm də orkestrin müşayiəti ilə ilk çıxışı olub: “Konsertdə şagirdlər dahi F.Əmirov musiqisinin milli ruhunu, fəlsəfi-psixoloji dərinliyini, melodiyanın gözəlliyini öz kiçik əlləri, isti ürəkləri və qəlbləri ilə tamaşaçılara təqdim ediblər. Altmış ildən artıqdır fəaliyyət göstərən Rauf Hacıyev adına 15 nömrəli onbirillik musiqi məktəbi istedadlı gənclərin əsas elm ocağına çevrilib. Ötən illər ərzində məktəbdə onlarla Prezident təqaüdçüsü və laureatlar yetişib. Məktəbin məzunları orta və ali ixtisas musiqi ocaqlarında təhsillərini davam etdirərək musiqi mədəniyyətimizin inkişafına öz töhfələrini verirlər. Tədris zamanı şagirdləri aşağı siniflərdən səhnədə, yaradıcılıqda özünü ifadə etmək üçün hazırlayır, onlara peşəkarlıq vərdişləri aşılayırıq. Yeni nəslin tərbiyəsi, estetik zövqünün, dünyagörüşünün formalaşması, yaradıcılıq bacarıqlarının düzgün istiqamətləndirilməsi və musiqi mədəniyyətimizin inkişafı naminə bundan sonra da məsuliyyətlə çalışaraq, şagirdlərin peşəkar ifaçı kimi yetişməsi üçün ən müasir tədris üsullarını işimizə tətbiq edəcəyik”.
Q.Qarayev adına kamera orkestrinin baş dirijoru, Xalq artisti Fəxrəddin Kərimov konsertin uğurla keçdiyini vurğulayıb: “Şagirdlərimizin ifası xoş təsir bağışladı. Proqramın çətin, mürəkkəb, maraqlı və rəngarəng tərtib edilməsinə baxmayaraq, uğurlu alındığını düşünürəm. Konsertdə iştirak edən bütün şagirdlər istedadlıdır. Onlarla keçirdiyim məşqlərdən böyük zövq aldım. Şagirdlərə xüsusi diqqət, qayğı və tələbkarlıqla yanaşdıqlarına görə müəllimlərə təşəkkür edirəm”.
Bölmənin digər xəbərləri
