RƏSMİ XRONİKA
FİNLANDİYA PARLAMENTİNİN SƏDRİ İLƏ GÖRÜŞ
![FİNLANDİYA PARLAMENTİNİN SƏDRİ İLƏ GÖRÜŞ](/files/2008/2/1200x630/14864535414659861996_1200x630.jpg)
![](/media/newsimages/2008/May/file1212251980654.jpg)
Dövlətimizin başçısını binanın önündə parlamentin - Eduskuntanın sədri Sauli Niinistö, baş katib Seppo Tiitinen, xarici əlaqələr departamentinin rəisi xanım Katriina Kuusinen böyük ehtiramla qarşıladılar.
Prezident İlham Əliyev parlamentin üzvləri ilə görüşdü və Fəxri qonaqlar kitabını imzaladı.
Parlamentin sədri SAULİ NİİNİSTÖ dövlətimizin başçısını salamlayaraq dedi:
-Zati-aliləri Azərbaycan Respublikasının Prezidenti cənab İlham Əliyev!
Hörmətli xanımlar və cənablar!
Finlandiyanın parlamentində - Eduskuntada sizi salamlamaqdan çox məmnunam. İki il bundan əvvəl biz burada parlamentin 100 illik yubileyini qeyd etmişik. Yüz il əvvəl Finlandiyanın bütün vətəndaşlarına seçkilərdə iştirak etmək və namizədliyini irəli sürmək üçün tam hüquqlar verilmişdir. Bu tarix 1906-cı ilə təsadüf edir. O vaxt Finlandiyanın demokratiyası üçün güclü zəmin yaradıldı və bu, bizim firavan ölkənin bünövrəsi idi.
Bilirəm ki, ötən gün Azərbaycan Xalq Cümhuriyyətinin yaranmasının 90-cı ildönümü qeyd olunubdur. İcazə verin, bir gün gec də olsa, bu münasibətlə Sizi təbrik edim. Eyni zamanda, mən bir müddət sonra Azərbaycan parlamentinin yaranmasının 90-cı ildönümü ilə əlaqədar öz təbriklərimi çatdıracağam.
Ötən aylar ərzində əlaqələrimiz daha da intensivləşibdir. Belə ki, Finlandiyanın bir çox siyasətçisi Azərbaycana səfər etmək imkanı əldə etdi. Hələ yanvar ayında bizim parlamentin xarici əlaqələr komitəsinin nümayəndə heyəti Sizin parlamentlə tanış olub, fevral ayında isə bizim xarici işlər nazirimiz, ATƏT-də sədrlik edən şəxs kimi Azərbaycana səfər etmişdir. Bu gün isə cənab Prezident, Sizi burada, Finlandiya demokratiyasının əsası sayılan parlamentdə qonaq qismində qəbul etməkdən çox məmnunuq.
Ölkələrimiz arasındakı münasibətləri əla kimi xarakterizə edirik və aramızda heç bir problem yoxdur. Bunu mən səmimiyyətlə təsdiq edə bilərəm. Bundan başqa, razılıqla deməliyəm ki, dünyada sülh və tərəqqinin genişləndirilməsi naminə beynəlxalq əməkdaşlıqda biz qüvvələrimizi birləşdirmişik. Son on ildə Azərbaycanda neft və qaz sənayesi inkişaf etməkdədir və xarici sərmayədarlar ölkənizin iqtisadiyyatına etibar edir. Həqiqətən də, bu inkişaf çox sabit görünür. Biz Sizin Avropa enerji bazarına gələcəkdə qaz təminatçısı kimi verəcəyiniz güclü töhfəni görməkdən çox məmnun olacağıq.
Cənab Prezident, Sizi bizim parlamentdə ali qonaq qismində bir daha salamlamaq istəyirəm və əminəm ki, Sizin Finlandiyaya səfəriniz xalqlarımızı bir-birinə daha da yaxınlaşdıracaqdır. Bir daha Sizi salamlayıram, Xoş gəlmisiniz!
######
![](/media/newsimages/2008/May/file1212252000900.jpg)