RƏSMİ XRONİKA
FİNLANDİYA PREZİDENTİ TARYA HALONENİN NİTQİ
![FİNLANDİYA PREZİDENTİ TARYA HALONENİN NİTQİ](/files/2008/2/1200x630/14864536221533143565_1200x630.jpg)
-Cənab Prezident, həyat yoldaşım və mən Sizi və xanım Əliyevanı Finlandiyada bir daha salamlamaqdan böyük məmnunluq duyuruq. Bu, Azərbaycan Prezidentinin Finlandiyaya ilk rəsmi səfəridir və ölkələrimiz arasında gözəl münasibətlərin olmasını nümayiş etdirir. 2005-ci ildə, Azərbaycanın gözəl paytaxtı Bakı şəhərində Sizin qonaqpərvərliyinizi duymaq imkanına nail olduq.
Hər iki ölkənin paytaxt şəhərləri dəniz sahilindədir. Xəzər dənizi dünyanın quru ərazilərlə əhatə olunmuş ən böyük su hövzəsidir. Bizim Baltik dənizi də qapalı dəniz sayılır və Qara dənizdən sonra dünyada ikinci ən böyük duzlu su ehtiyatı buradadır. Hər ikimiz bilirik ki, dənizlər xalqları ayırmır, onları birləşdirir. Onlar müsbət iqtisadi, mədəni və ətraf mühit qüvvəsinə çevrilə biləcək təbii əlaqəni təşkil edir. Finlandiyada biz istəyirik ki, Baltik dənizi regionunda ölkələr arasında daha sıx əməkdaşlıq inkişaf etsin və arzu edirik ki, regional əməkdaşlıqda müxtəlif formada iştirak edən ölkələrlə təcrübəmizi bölüşək.
Mən Minsk prosesi ilə bağlı ölkənizə Finlandiyanın xarici işlər naziri kimi səfərim zamanı 1996-cı ildən etibarən Azərbaycanın inkişafını daha yaxından izləmək imkanını əldə etdim. Son illər ərzində ölkəniz vətəndaşlarınızın rifahına və davamlı inkişafa yönəlmiş təbii sərvətlərdən irəli gələn imkanlarını istifadə edərək, sürətli iqtisadi inkişafa nail olmuşdur.
2005-ci ildə mən Azərbaycanda rəsmi səfərdə olarkən, bir neçə həftə sonra ölkənizdə parlament seçkiləri keçirilməli idi. Sizin Finlandiyaya səfəriniz də ölkənizdə seçki ilinə düşür. Biz, finlandiyalılar, demokratik islahatlar sahəsində Sizin göstərdiyiniz səyləri dəyərləndiririk. İnanıram ki, müsbət meyil qarşıdan gələn prezident seçkilərində davam edəcək və beynəlxalq müşahidəçilər ölkənizə məmnunluqla səfər edəcəklər.
Finlandiya bu il Avropada Təhlükəsizlik və Əməkdaşlıq Təşkilatında - ATƏT-də sədrlik edir. Bu baxımdan, Siz bu yaxınlarda bizim xarici işlər nazirini qəbul etmisiniz. ATƏT prosesi 33 il əvvəl burada, Helsinkidə başladı. Hazırda dünya 1975-ci ildə olduğundan xeyli fərqlənir. Bununla belə, təşkilatın fundamental prinsipləri eyni olaraq qalır: demokratiyaya riayət və onun bərqərar olunması, qanunun aliliyi, insan hüquqları və söz azadlığı siyasi sabitliyin, təhlükəsizliyin, iqtisadi artımın və vətəndaşların rifahının təmin edilməsində əsas vasitələrdir. Avropa Şurasının üzvləri kimi, biz həmin fundamental dəyərlərə sadiqik.
ATƏT-də sədrlik edən ölkə kimi Finlandiya Dağlıq Qarabağ münaqişəsinin həllinə yardım göstərmək məqsədi ilə əlindən gələn səyləri göstərir. Hesab edirəm ki, bu münaqişənin həlli bütün Cənubi Qafqazda və qonşu yerlərdə yeni böyük inkişaf potensialını təmin edəcəkdir. Müsbət nəticə regionun iqtisadi və siyasi əhəmiyyətini artırardı. Ümidvaram ki, tərəflər Minsk prosesindən istifadə edərək, nizamlanmaya nail olmaq üçün cəsarət və siyasi iradə nümayiş etdirəcəklər.
Bu gün qloballaşan dünyada ölkələr tədricən bir-birindən asılı vəziyyətə düşür. Biz həmin qarşılıqlı asılılığı müsbət amilə çevirməliyik və qloballaşmadan ekoloji baxımdan davamlı inkişaf və sosial ədalətin təşviqi üçün resurs kimi istifadə etməliyik. Birləşmiş Millətlər Təşkilatı həmin səylərin göstərilməsi məqsədi ilə əsas çoxtərəfli əməkdaşlıq forumu ola bilər.
Düşünürəm ki, çiçəklənən dövlət nümunəsi və təhsilə, uzunmüddətli tədrisə sərmayələrin qoyulması, eləcə də yeniliklər Finlandiyanın uğurlarını şərtləndirən amillərdir. Bir sıra beynəlxalq araşdırmalar nəticəsində Finlandiya dünyada ən rəqabətədavamlı ölkələr sırasına daxil edilmişdir və bizim rəhbərliyimiz şəffaf və yaxşı işlədiyinə görə tez-tez tərifə layiq görülür.
Avropa İttifaqının Yeni qonşuluq siyasəti qonşu ölkələrdə sabitliyin, rifahın və tərəqqinin təşviqinə, həmin ölkələr ilə Aİ arasında daha sıx əməkdaşlıq etməyə, eləcə də qonşuların özlərinin arasında işbirliyinin qurulmasına yönəlibdir. Avropa İttifaqı ilə Azərbaycan arasında münasibətlərin inkişaf etdirilməsində olan məqsədimiz Azərbaycan üzrə Tədbirlər planının qəbul edilməsi ilə yanaşı, Finlandiyanın Avropa İttifaqında sədrliyi ərzində tərəqqinin əldə olunmasından ibarətdir.
Finlandiya və Azərbaycan vaxtilə eyni imperiyanın bir hissəsi idi. Bu gün isə müstəqil ölkələr kimi biz bir çox eyni beynəlxalq təşkilatların üzvləriyik. Əlbəttə ki, çoxtərəfli münasibətlər vacibdir. Eyni zamanda, biz ikitərəfli əlaqələrimizin də təşviq və inkişaf etdirilməsində maraqlıyıq. Ümid edirəm ki, səfəriniz ölkələrimiz arasında iqtisadi əməkdaşlığın və ticarətin inkişafına töhfə verəcəkdir.
Biz həmçinin mədəni əməkdaşlıq sahəsində daha çox işlər görə bilərik. Hər iki ölkənin mədəniyyətinə Şərq və Qərb təsir etmişdir və hər iki tərəfin zəngin poeziya, rəqs və musiqi ənənələri var. Misal üçün, Finlandiyada Azərbaycan filmləri və musiqi festivalları keçirilmişdir.
Cənab Prezident, mədəni mübadilələr sahəsində bizim zəngin təcrübəmiz var və bizim cəmiyyətlərimizin gördüyü işlərə əsaslanaraq, bu təcrübəni bölüşə bilərik.
Cənab Prezident, mən bu badəni Sizin və xanımınız Mehriban Əliyevanın sağlığına, Azərbaycan xalqının xoşbəxtliyi və tərəqqisi, eləcə də ölkələrimiz arasında dərin əməkdaşlığın şərəfinə qaldırmaq istəyirəm.
######