Bakı, 3 aprel, AZƏRTAC 

Aprelin 26-28-də Bakıda keçiriləcək Formula 1 Azərbaycan Qran-Prisinə hazırlıq işləri çərçivəsində “Bakı Şəhər Halqası” Əməliyyat Şirkəti və Bakı Marşal Klubu marşalların bacarıq və təcrübələrinin artırılması məqsədilə tədbir və təlimlərin təşkilinə start verib.

Fövqəladə Hallar Nazirliyindən AZƏRTAC-a bildiriblər ki, bu məqsədlə martın 30-dan başlayaraq dörd gün ərzində FHN Akademiyasında nazirliyin dəstəyi ilə yanğından mühafizə və xilasetmə üzrə ixtisaslaşmış marşallar üçün təlimlər keçirilib.

Təlimlərin keçirilməsində məqsəd yarışlar zamanı fövqəladə hal yarandıqda əməliyyat və qarşılıqlı fəaliyyət planlarının reallığının yoxlanılması, yanğınların qarşısının alınması və nəticələrin operativ şəkildə aradan qaldırılması üçün marşalların peşəkarlığının daha da artırılmasıdır.

Nəzəri və praktik hissələrdən ibarət təlimlərdə ümumilikdə 200 nəfər (FHN-in 63 əməkdaşı və 137 könüllü marşal) iştirak edib. Akademiyanın xüsusi ixtisaslı təlim-tədris heyəti iştirakçılara yanğın təhlükəsizliyinə dair biliklərin aşılanması, yanğının qarşısının alınması və xilasetmə tədbirlərinin təşkili istiqamətində bacarıqların möhkəmləndirilməsi məqsədilə vacib təqdimatlar edib. Bundan əlavə, yanğın təhlükəsizliyi və xilasetmə işlərində istifadə edilən xüsusi texnika və avadanlıqla davranış qaydaları da əyani vasitələrlə izah olunub. Beləliklə, marşallar nəzəri hissələrdə qazandıqları bilikləri praktiki hissədə tətbiq etmək imkanı qazanıb.

Bakı Marşal Klubu yanğından mühafizə və xilasetmə marşallarının hazırlığında mühüm rol oynayan təlimin təşkilinə görə Fövqəladə Hallar Nazirliyinə minnətdarlığını bildirib.