Fouzi Salim: Vahid parlament birliyinin yaradılması zamanın tələbidir
Bakı, 1 iyul, AZƏRTAC
Qoşulmama Hərəkatı yarandığı gündən etibarən beynəlxalq arenada sülhün və təhlükəsizliyin qorunmasında mühüm rol oynayıb. Mübarizə üçün birgə strategiya və dövlətlər arasında bərabərlik prinsipini əsas tutan Qoşulmama Hərəkatı Parlament Şəbəkəsi insan hüquqlarının pozulmasının qarşısını ala biləcək və dövlətlərin daxili işlərinə müdaxilə etməmək prinsipinə əsaslanan bir təsisatdır.
AZƏRTAC xəbər verir ki, bu sözləri Heydər Əliyev Mərkəzində Qoşulmama Hərəkatı Parlament Şəbəkəsinin “Dünyada sülhün və dayanıqlı inkişafın təşviqində milli parlamentlərin rolunun gücləndirilməsi” mövzusuna həsr olunan Bakı konfransında iştirak edən Liviya parlament sədrinin birinci müavini Fouzi Salim çıxışı zamanı söyləyib.
Bildirilib ki, hazırda dünyada mövcud problemlərdən biri də yoxsulluq məsələsidir. Bu problemlərin həll olunmasında Qoşulmama Hərəkatı böyük rol oynaya bilər.
“Vahid parlament birliyinin yaradılması zamanın tələbidir. Üzv ölkələrin parlamentariləri kimi səylərimizi gücləndirməliyik ki, bu şəbəkənin rolu artsın”, - deyə Liviya parlament sədrinin birinci müavini vurğulayıb.
Bölmənin digər xəbərləri
