Fransa Prezidentində koronavirusun əlamətləri özünü göstərir
Paris, 18 dekabr, AZƏRTAC
Fransa Prezidenti Emmanuel Makrondan sonra Baş nazir Jan Kasteks də özünü təcrid edib.
AZƏRTAC xəbər verir ki, Baş nazirdə koronavirus əlamətləri olmasa da, o, respublika prezidenti ilə kontaktda olduğu üçün sanitar qaydalara riayət edərək, özünü təcrid edib.
Bildirilir ki, Prezident Makron öskürür, bütün fransız və beynəlxalq siyasətçilər təlaşdadır. Fransa Prezidentinin yoluxdurduğu şəxslərin siyahısının uzun olduğu qeyd edilir. E.Makron koronavirus diaqnozundan əvvəl Milli Assambleyanın sədri Rişar Ferran, Baş nazir Jan Kasteks daxil olmaqla 10-dan çox şəxslə Yelisey sarayında şam yeməyində olub. Şam yeməyində iştirak edənlərin də özünü təcrid qaydasına riayət etdikləri diqqətə çatdırılıb.
Eyni zamanda, E. Makron bir çox beynəlxalq təşkilatların rəhbərləri və yüksək rütbəli nümayəndələrlə görüşdüyü və onların da karantin rejimində olduğu bildirilir.
Prezident E. Makron sanitar qaydalara uyğun olaraq 7 gün Versalda Lantern rezidensiyasında olacaq. Onda öskürək, yorğunluq və temperatur kimi əlamətlərin olduğu qeyd edilib.
Xatırladaq ki, Fransada 6 nəfərdən çox toplaşmaq qadağandır.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
