Fransada elektrik və qaz sektorlarının işçiləri tətilə başlayıblar
Paris, 2 sentyabr, AZƏRTAC
Fransada elektrik və qaz sektorunun işçiləri bu gün 24 saatlıq tətilə çıxıblar. Tətillə bağlı çağırış elektrik və qaz sənayesinin əsas həmkarlar ittifaqlarından biri olan CGT (FNME-CGT) tərəfindən edilib. Bu səfərbərlik son günlərdə gündəmə gələn “10 sentyabr – hər şeyi blokla” hərəkatından xeyli əvvəl planlaşdırılıb.
AZƏRTAC xəbər verir ki, FNME-CGT həmkarlar ittifaqının baş katibi Mattyö Pino tətillə bağlı açıqlama verərək, artıq 220-dən çox piket məntəqəsi qurulduğunu deyib. CGT həmkarlar ittifaqının tələbləri çoxşaxəlidir, sosial və iqtisadi yönümlüdür. Tətilçilər son pensiya islahatının ləğvini, qaz və elektrik haqlarında tətbiq olunan ƏDV-nin endirilməsini, əməkhaqqı ilə bağlı islahatlar, əməkhaqqı cədvəlinin ilk pilləsinin minimum əməkhaqqı (SMIC) ilə uyğunlaşdırılmasını, növbətçilik ödənişlərinin artırılmasını tələb edirlər. Digər həmkarlar ittifaqları da bəzi tələblərlə, xüsusilə də əməkhaqqı cədvəli ilə bağlı həmrəy olduqlarını bildiriblər.
CGT nümayəndəsi Fabris Kudur bildirib ki, sentyabrın 2-də başlayan və uzadıla bilən bu tətil 10 sentyabrdakı "hər şeyi blokla" hərəkatı ilə ziddiyyət təşkil etmir, əksinə onu dəstəkləyə bilər. "Bizim sentyabrın 2-dən başlayan tətilimiz 10 sentyabr aksiyası ilə ziddiyyət təşkil etmir. Əksinə, bu mobilizasiya elektrik və qaz sektorundakı hərəkata inteqrasiya oluna bilər", - deyə o qeyd edib.
Tətilin nəticəsində enerji istehsalında azalmalar və istehsal müəssisələrində blokadalar gözlənilir. Kudur bəyan edib ki, bəzi enerji istehsalı müəssisələrinin girişində blokadalar planlaşdırılır.
Elektrik və qaz sektorundakı bu tətil, yalnız sosial narazılığı ifadə etməklə kifayətlənmir, eyni zamanda, sentyabrın 10-da və 18-də planlaşdırılan daha böyük aksiyalar öncəsi hökumətə ciddi xəbərdarlıq kimi də qiymətləndirilir.
Bölmənin digər xəbərləri
