Fransada həbsxanalara hücum davam edir
Paris, 16 aprel, AZƏRTAC
Fransada həbsxanalara hücum davam edir, ötən gecə yenidən Taraskon həbsxanasının dayanacağında üç avtomobil yandırılıb.
Son günlər ölkə daxilində həbsxanaları hədəf alan bir neçə hücum olub. Bir neçə saytda DDPF (Fransız Məhbusların Hüquqlarının Müdafiəsi) abreviaturuna rast gəlinib.
AZƏRTAC xəbər verir ki, Buş-dü-Ronda Taraskon həbsxanasının dayanacağında aprelin 16-na keçən gecə üç avtomobil yandırılıb. Son günlər Fransa həbsxanalarına qarşı bir neçə hücum həyata keçirilib. Məlumata görə, həbsxanaların gözətçi qüllələrində yerləşdirilən məmurlar heç nə hiss etməyiblər və videomüşahidə kameraları cinayəti törədənləri müəyyən etməyə imkan vermir.
Ədliyyə naziri Jerald Darmanən bu hadisələri terror kimi xarakterizə edib. Milli Terrorla Mübarizə Prokurorluğu xüsusilə terror cinayətləri törətmək üçün sui-qəsdlə bağlı istintaqa başlayıb.
Həmçinin keçən gecə Sen-və-Marnda “Villenoy” həbsxana məmurunun yaşadığı binanın pilləkənində yanğın törədilib. Həmin binanın divarında DDPF yazısı da aşkar edilib. Eyni abreviatur penitensiar mərkəzlərə qarşı bu hücumların hədəfi olan bir neçə saytda tapılıb.
Fransa xüsusi xidmət orqanlarına məlum olmayan DDPF qrupu bir neçə gün əvvəl “Telegram” şifrəli mesajlaşma xidmətində yaradılıb. “Biz terrorçu deyilik, həbsxanalardakı insan haqlarını müdafiə etmək üçün buradayıq”, - deyə kanalda yazılıb. Son günlər bu mesajlaşmada videolar, xüsusilə də mühafizəçilərə qarşı təhdid xarakterli yazılar yayılıb.
Bölmənin digər xəbərləri
