Fransada quş qripi əleyhinə profilaktik tədbir təsərrüfatçıların etirazına səbəb olub
Paris, 29 dekabr, AZƏRTAC
Fransa COVID-19 pandemiyası ilə bərabər ölkəni bürüyən quş qripinə qarşı da mübarizə aparır.
AZƏRTAC xəbər verir ki, ölkədə quş qripinin yayılmasının qarşısını almaq məqsədilə Pireney-Atlantik (Pyrenees-Atlantiques) departamentinin yüzlərlə quşçuluq fermasında kəsimlə bağlı rəsmi qərar qəbul edilib.
Rəsmi qəzetdə dərc edilən qərara əsasən ölkədə H5N8 ştammlı yüksək patogenli virusun vəhşi təbiətdə yaşayan quşlar və quşçuluq təsərrüfatlarında, xüsusilə də sıx quşçuluq təsərrüfatları olan Land və Pireney-Atlantik departamentlərində geniş yayıldığı qeyd edilib.
Noyabr ayından ölkənin vəhşi təbiətinin patogen virusun təsiri altında olduğu və H5N8 virusunun xüsusilə quşçuluq təsərrüfatına mənfi təsir etdiyi, virusun insana yoluxmadığı və cənub istiqamətində hərəkət edən köçəri quşlar vasitəsilə yayıldığı bildirilir.
Land departamentində 25 təsərrüfatda profilaktik məqsədlə həyata keçirilmiş kəsmə tədbirinə qarşı etiraz nümayişi keçirilib. Təsərrüfatçılar kəsmə tədbirinin qəbul edilməsindən əvvəl müvafiq analizlərin aparılmasını tələb edirlər.
Qeyd edək ki, Land departamentində artıq 40 mindən çox ördək məhv edilib.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
