Fransanın Azərbaycana qarşı fəaliyyəti ermənipərəst dövlətin nüfuzunun zədələnməsi ilə nəticələndi
Bakı, 10 yanvar, AZƏRTAC
Fransa bütün siyasi gücünü Azərbaycana qarşı səfərbər edərək Senatına və Milli Assambleyasına ölkəmizə qarşı böhtan xarakterli qətnamələr qəbul etdirdi. Ermənipərəst dövlət öz çirkin əməllərinin davamı kimi BMT Təhlükəsizlik Şurasında yalançı ittihamlarla Azərbaycana qarşı fəaliyyətə də başladı. Onun nəticələri isə Fransanın istədiyi kimi olmamaqla bərabər, nüfuzunun zədələnməsi ilə nəticələndi, Azərbaycanın isə maraqlarına cavab verdi.
Bu fikirləri AZƏRTAC-a açıqlamasında Milli Məclisin deputatı Nurlan Həsənov söyləyib.
“Məlum olduğu kimi, uzun illərdir Fransa Azərbaycana qarşı açıq və ya gizli formada qərəzli və ikili münasibət nümayiş etdirir. Belə ki, bu ölkə 2022-ci ildə Avropa İttifaqının təşəbbüsü ilə Azərbaycan və Ermənistan arasında vasitəçi olmaq üçün səy göstərirdi. Bu da xoşniyyətli bir proses ola biləcəyi üçün ölkəmiz tərəfindən müsbət qarşılandı. Lakin Fransa Minsk qrupunda olduğu kimi, burada da əsl simasızlığını göstərdiyi üçün iki ölkə arasındakı kövrək sülhə töhfə vermək şansını itirdi”, - deyə deputat vurğulayıb.
O qeyd edib ki, ötən ilin sentyabrın 12-də Azərbaycan-Ermənistan sərhədində gecə başlayan döyüşlərlə bağlı Fransa BMT Təhlükəsizlik Şurasının toplantısını çağırdı. Bununla da rəsmi İrəvanın müraciəti əsasında BMT TŞ-nin iclasının gündəliyinə “Ermənistanın BMT yanında daimi nümayəndəsinin məktubu” adlı bənd daxil edildi. Əlbəttə ki, bu bənd birbaşa da olmasa, dolayısı ilə Fransanın təşəbbüsü ilə reallaşdı. Buna baxmayaraq, Ermənistan və Fransa birliyinin ölkəmizə qarşı məkrli planları reallaşmadı.
Növbəti belə təşəbbüsün isə keçən ilin sonunda baş verdiyini diqqətə çatdıran Nurlan Həsənov deyib: “Ötən il dekabrın 12-dən Azərbaycanın qeyri-hökumət təşkilatlarının nümayəndələrinin, ekofəalların və könüllülərin Rusiya sülhməramlılarının müvəqqəti yerləşdirildiyi Azərbaycan ərazilərində ermənilər tərəfindən faydalı qazıntı yataqlarımızın qanunsuz istismarına etiraz olaraq Laçın-Xankəndi yolunda keçirdikləri aksiya ilə bağlı Fransa yenə BMT TŞ-yə müraciət etdi. Demək ki, Ermənistan cinayətkar da olsa, Fransa onu müdafiə etməyi özünə vəzifə hesab edir. Həmçinin onunla bütün platformalarda eyni ağızdan danışır. Lakin Fransanın hər zamankı kimi görmək istəmədiyi bəzi məqamlar var. Belə ki, uzun illər ərzində Ermənistan Laçın dəhlizindən qeyri-qanuni fəaliyyətlər və yük daşımalar üçün istifadə edib. Qırx dörd günlük Vətən müharibəsi yekunlaşsa da, qarşı tərəf hələ də öz çirkin əməllərinə davam edir. Buna görə də dekabrın 20-21-də Fransa və Ermənistan Laçın yolundakı vəziyyətlə bağlı BMT Təhlükəsizlik Şurasının iclasını il ərzində ikinci dəfə çağırdılar. Bu dəfə də iki riyakar dövlət öz istədiyinə nail ola bilmədi. Çünki ölkəmizin uzun illər ərzində apardığı uzaqgörən və düşünülmüş siyasət bu prosesə mane oldu. Həmçinin bu prosesdə Böyük Britaniya, BƏƏ, Rusiya və Albaniya Fransanın təşəbbüsünün əleyhinə çıxış edərək Azərbaycanın haqlı mövqeyini sonadək müdafiə etdi”.
Deputat əlavə edib ki, Fransa ölkəmizin əleyhinə hazırladığı sənədin uğursuz olduğunu anladığı üçün rəsmən məktubla müraciət edərək prosesi dayandırdığını bəyan etmək məcburiyyətində qaldı. Ümid edirik ki, Fransa bundan sonra Azərbaycana qarşı qərəzli münasibətə son qoyacaq. Çünki BMT Təhlükəsizlik Şurasının bir üzvünün beynəlxalq hüququ heçə sayması qəbuledilməzdir. Azərbaycan heç bir qüvvənin təsirinə, təzyiqinə baxmayaraq, suverenliyinin qorunması uğrunda fəaliyyətini davam etdirəcək.
Bölmənin digər xəbərləri
