Fransanın siyasi partiyaları erməni diasporlarının təsiri altındadır
Bakı, 30 dekabr, AZƏRTAC
Ermənistanın Fransadakı səfirliyinin yaydığı məlumata görə, Fransanın siyasi partiyaları erməni diasporlarının təsiri altındadır. Bundan nəticə çıxarmaq olur ki, erməni diasporu, Fransanın nəinki yüksək etalondakı siyasi dairələrinə, eləcə də Fransanın siyasi partiyalarına və ictimai qurumlarına ciddi təsir imkanlarına malikdir. Onlar bu ölkənin istər hakimiyyət, istərsə də müxalifət düşərgəsindən öz məqsədləri üçün istifadə etmək gücündədirlər.
Bu fikirləri AZƏRTAC-a açıqlamasında Tarix İnstitutunun əməkdaşı Faiq İsmayılov deyib.
Onun sözlərinə görə, səfirliyin yaydığı məlumatda Fransanın partiya liderlərinə və ictimai xadimlərinə Azərbaycan əleyhinə diktə olunan açıq məktubunun Le Monde qəzetində dərc olunduğu qeyd edilib. Diplomatik nümayəndəlik Fransanın Prezidenti Emmanuel Makrona ünvanlanan məktubun mətninin erməni dilinə tərcüməsini də dərc edib.
Məktubu Respublikaçılar Partiyasının sədri Erik Çiotti, Fransa Sosialist Partiyasının baş katibi Olivye For, Demokratlar və Müstəqillər İttifaqının sədri Herve Marsel, Fransa Kommunist Partiyasının baş katibi Fabien Russel, Fransa Senatı Komissiyasının sədri imzalayıblar. Fransa Senatının Xarici Əlaqələr və Müdafiə Komissiyasının sədri Kristian Kambon, Senatdakı “Respublikaçılar” Partiyası fraksiyasının sədri Bruno Retaio, Fransa Senatındakı Kommunist Partiyası fraksiyasının rəhbəri Elian Asassi, “Ekologiya, həmrəylik və ərazi idarəsi”nin sədri və Senatdakı fraksiya rəhbəri Quillaume Gontar, Senatda Sosialist Partiyası fraksiyasının rəhbəri Patrik Kannet, Senatın Fransa-Ermənistan Dostluq Qrupunun sədri Gilbert-Luc Devinaz və senator Pierre Ouzoulia Azərbaycanın 30 il Ermənistan silahlı qüvvələrinin işğalı altında olduğunu, Azərbaycanın ərazi bütövlüyünün və sərhədlərinin toxunulmazlığının danışıqlar mövzusu olmadığını ağıllarına belə gətirməyiblər.
Məktubda qeyd olunur ki, dekabrın 12-dən guya Azərbaycan Qarabağın erməni əhalisini xarici dünya ilə birləşdirən yeganə yolu ələ keçirib və bununla da böyük humanitar fəlakət riski yaradıb. Bu ifadə ilə Fransanın başbilənləri Azərbaycanın beynəlxalq səviyyədə tanınan sərhədlərini şübhə altına almağa cəhd edir və utanmadan yalan danışırlar. Belə ki, nə Azərbaycanın sərhədləri daxilində, nə də onun sərhədləri xaricində “Artsax” adlı qurum və ya toplum mövcud deyil. Əgər belə bir toplum mövcud olsaydı arxada qalan 30 ilə yaxın bir dövrdə Fransanın da üzv olduğu ATƏT-in Minsk qrupu çərçivəsində aparılan danışıqlarda imzalanan hansısa bir rəsmi sənəddə öz əksini tapardı.
Qarabağdakı erməni əhalisinin hüquqlarının Azərbaycan Konstitusiyası ilə tənzimlənən məsələ və bunun Azərbaycanın daxili işi olduğunu vurğulayan F.İsmayılov deyib: “Prezident İlham Əliyev bu məsələni açıq şəkildə dəfələrlə bəyan edib: Azərbaycanda yaşayan bütün erməni əsilli insanlar Azərbaycan vətəndaşlarıdır və onların hüquqları Azərbaycan Konstitusiyası ilə qorunur. Buna kiminsə şübhəsi olmamalıdır. Məktubda “Qarabağ münaqişəsinin sülh yolu ilə həllini nəzərdə tutan beynəlxalq hüququn, Cenevrə konvensiyalarının və ATƏT-in Minsk qrupu çərçivəsində aparılan danışıqların kobud şəkildə pozulması” göstərilir. Bunu hansısa bir jurnalist və ya bir vətəndaş demiş olsaydı fikir verməmək olardı. Lakin bunu söyləyən senator nədən anlamır ki, 2020-ci il noyabrın 10-da Azərbaycan, Rusiya, Ermənistan arasında imzalanan üçtərəfli Bəyanat Qarabağ münaqişəsini dəfn etdi. Əgər bu münaqişə iki ildir müzakirə olunmursa, ATƏT-in Minsk qrupu çərçivəsində danışıqlar aparılmırsa, hansı hüquq pozuntusundan söhbət gedə bilər? İndi edilən bu müraciət riyakarlıq deyilmi?”.
Məktubda daha sonra deyilir ki, “Azərbaycan tərəfindən etnik ədavətin qızışdırılması, erməni mədəni irsinin dağıdılması, 2022-ci ilin sentyabrında Ermənistana hücum və ölkə ərazisinin bir hissəsinin qanunsuz işğalı - indi qəbuledilməzdir”. Fransa qanunvericilərinə və senatorlarına bir daha anladıram ki, tolerantlıq və multikulturalizm ənənələrinə görə dünyada nümunə göstərilən Azərbaycanda 30 mindən çox erməni əsilli vətəndaş yaşayır və onların hər biri bugünkü həyatlarından çox razıdırlar.
Ermənilər Azərbaycan ərazilərinə XVIII əsrin sonları və XIX-XX əsrlərdə ruslar tərəfindən köçürülmüş xalqdır. Onların burada “qədim mədəni irs”indən söhbət gedə bilməz. Qarabağ regionu və ona bitişik ətraf ərazilərdə ermənilərin sahib çıxmaq istədikləri, xristianlığa qədər və xristianlıq dövrü abidələrinin isə erməni xalqına heç bir aidiyyəti yoxdur. Fransız rəsmiləri və digər ziyalıları anlamalıdırlar ki, Ermənistanla Azərbaycan arasında dövlət sərhədləri hələ müəyyənləşdirilməyib. Əgər sərhədlər müəyyənləşdirilməyibsə, hansı sərhəd pozuntusundan söhbət gedə bilər? Sərhəd “pozuntusu” nədən “indi qəbuledilməz” olur? Bəs, 1992-ci ildə Ermənistanın Azərbaycanın 20 faiz torpağını işğal etməsi niyə fransızlar tərəfindən “qanuni” hesab edilir? Azərbaycan ərazilərinin ermənilər tərəfindən işğalı, təbii sərvətlərinin talanması, milyondan çox insanın əmlakının zorla əlindən alınması, 800-dən çox inzibati yaşayış məntəqələrinin xarabalığa çevrilməsi, Xocalı, Qaradağlı, Ballıca kimi qətliamların törədilməsi fransızlara görə hansı beynəlxalq hüquqla tənzimlənir?
Fransanın siyasi nümayəndələri bu məktubla Fransa Prezidenti Makronu Azərbaycana qarşı atdığı radikal addımları daha da genişləndirməyə, radikal separatçı qrupları dəstəkləməklə Azərbaycanın daxilində daimi münaqişə ocağının yaradılmasına görə cinayətə təhrik edirlər”.
Bölmənin digər xəbərləri
