GDU ilə Dokuz Eylül Universiteti arasında elmi-təcrübə mübadiləsi davam edəcək
Gəncə, 23 iyun, Elcan Məmmədov, AZƏRTAC
İkili diplom proqramı çərçivəsində Dokuz Eylül Universitetinin əməkdaşlarının Gəncə Dövlət Universitetində keçdikləri təcrübə mübadiləsinin ikinci mərhələsi bu gün yekunlaşıb.
Universitetdən AZƏRTAC-ın bölgə müxbirinə verilən məlumata görə, bununla əlaqədar Gəncə Dövlət Universitetinin rektoru Yusif Yusibov təcrübə mübadiləsini uğurla başa vuran Dokuz Eylül Universitetinin professoru Arzu Görməz və dosent Pelin Balçık ilə görüşüb.
Universitetin İnnovasiyalar Departamentinin direktoru Vasif Həsənovun, Kimya-biologiya fakültəsinin dekanı İsfəndiyar Alverdiyevin və fakültənin humanitar məsələlər üzrə dekan müavini Yeganə Aslanovanın iştirak etdiyi görüşdə universitetlərarası elmi əməkdaşlıqdan və ikili diplom proqramının əhəmiyyətindən danışılıb.
Rektor Yusif Yusibov Dokuz Eylül Universitetinin rəhbərliyinə və təcrübədə iştirak edən müəllimlərə təşəkkürünü bildirib.
Görüş zamanı 2 həftə ərzində təcrübə mübadiləsi çərçivəsində görülən işlərdən danışılıb, türkiyəli müəllimlərin GDU-nun Kimya-biologiya fakültəsində müxtəlif mövzularda keçdiyi seminarlar və təcrübə mübadiləsi aparmaq məqsədilə iştirak etdiyi ekspedisiya barədə söhbət açılıb.
Qarşılıqlı elmi-təcrübə mübadiləsi bundan sonra da davam etdiriləcək.
Bölmənin digər xəbərləri
