Bakı, 19 dekabr, Məmməd İsayev, AZƏRTAC

Son illər Azərbaycanın bütün sahələrdə əldə etdiyi sürətli inkişaf ölkəmizi mühüm beynəlxalq tədbirlərin, o cümlədən mötəbər idman yarışlarının yüksək səviyyədə keçirildiyi məkana çevirib. Azərbaycanın uğurla ev sahibliyi etdiyi beynəlxalq idman turnirləri və tədbirləri yüksək təşkilatçılığına görə yerli və xarici mütəxəssislər, iştirakçılar tərəfindən təqdirlə qarşılanır.

Təbii ki, Azərbaycanda idman yarışlarının yüksək səviyyədə keçirilməsində son illər ölkəmizdə çiçəklənmə dövrünü yaşayan könüllülük hərəkatının da özünəməxsus rolu var.

“Azərbaycan Könüllük Xidməti” proqramının əlaqələndiricisi Hüsniyyə Qafarova ölkəmizdə könüllülük hərəkatının formalaşması, inkişafı, bu istiqamətdə həyata keçirilən tədbirlərlə bağlı AZƏRTAC-ın müxbirinin suallarını cavablandırıb.

- Son dövrlərdə könüllü və könüllülük anlayışı haqqında tez-tez eşidirik. Ümumilikdə könüllülük nədir, onun nə kimi faydaları var? Azərbaycanda könüllülüklə bağlı hansı tədbirlər həyata keçirilir?

- Bildiyiniz kimi, könüllülük anlayışı qədim mədəni əsaslara söykənir. Əgər tarixə nəzər salsaq, ayrı-ayrı dövrlərdə könüllülüyün müxtəlif nümunələri ilə tanış ola bilərik. Müasir könüllülük anlayışı isə bu nümunələrin daha da təkmilləşmiş formasıdır. Müasir könüllülüyün faydalarına iki prizmadan yanaşmaq mümkündür. Bir tərəfdən, könüllülük cəmiyyətin, insanların rifahı naminə təmənnasız fəaliyyətdir və cəmiyyətin inkişafına istiqamətlənib. Hətta bu, bəzən dövlət büdcəsində müəyyən xərclərə qənaət etməyə imkan verir.

Əlbəttə, bu gün könüllülüyü müxtəlif fəaliyyət sahələrində görmək mümkündür. Dünyanın müxtəlif ölkələrinin təcrübələrinə baxsaq, könüllülülərin əlillər, qocalar, qaçqın və məcburi köçkünlərə xidmət, həmçinin ətraf mühitin mühafizəsi və ekoloji tarazlığın qorunması, insan hüquq və azadlıqlarının, sülh mədəniyyətinin, tolerantlığın təbliği və s. sahələrdə həyata keçirilən tədbirlərə dəstək olduqlarını müşahidə edərik. Digər tərəfdən isə könüllülük həm də gənclərin şəxsi inkişafı üçün vacib platformadır. Könüllülük gənclərin hərtərəfli inkişafına, ilkin peşəkar təcrübələrə yiyələnmələrinə imkan yaradır. Bu gün bir çox peşəkarın uğur hekayələri ilə tanış olduqda, könüllülüyün gənclərin formalaşmasında mühüm rolunu görə bilərik.

- Bəs Azərbaycanda könüllülük kifayət qədər inkişaf edibmi? Bu sahənin inkişafı üçün hansı addımlar atılır?

- Könüllülük Azərbaycanda da yeni bir anlayış deyil. Əksinə, könüllülüyün müxtəlif formaları və əlamətləri Azərbaycanın milli və mədəni dəyərlərində əksini tapıb.

İldən-ilə daha da sürətlə inkişaf edən Azərbaycanda həyata keçirilən uğurlu islahatlar bütün sahələrdə müsbət nəticələrlə müşahidə olunur. Son bir neçə il ərzində Azərbaycan bir çox mötəbər tədbirə ev sahibliyi edib. Bu tədbirlərin ölkəmizdə həyata keçirilməsi Azərbaycanın beynəlxalq arenada tanınması ilə yanaşı, həm də bir çox sahənin inkişafına təkan verir.

Sevindirici haldır ki, dünyanın inkişaf etmiş ölkələrində olduğu kimi, Azərbaycanda da belə tədbirlərin təşkilində aparıcı qüvvələrdən biri olaraq könüllülük fəaliyyətinə mühüm önəm verilir. Əlbəttə, bu, gənclərlə bağlı digər sahələrlə yanaşı, könüllülük fəaliyyətinin inkişafına təkan verən, artıq bütün dünyada uğurlu təcrübə kimi qəbul olunan Azərbaycanın dövlət gənclər siyasətinin müvəffəqiyyətlə həyata keçirilməsinin nəticəsidir. Azərbaycanda gənclər sahəsində həyata keçirilən tədbirlər və Dövlət proqramları könüllülük fəaliyyətində kifayət qədər təcrübəsi və bu anlayışın inkişafında mühüm rolu olan gənclər təşkilatlarının könüllülüyün geniş yayılması işinə vacib töhfələr verməsinə imkan yaradır.

- Qeyd etdiniz ki, könüllülüyün inkişafında gənclər platformalarının mühüm rolu var. Ölkənin ən böyük gənclər platforması olan Azərbaycan Respublikası Gənclər Təşkilatları Milli Şurası bu sahədə hansı işlər görür?

- Bildiyiniz kimi, Azərbaycan Respublikası Gənclər Təşkilatları Milli Şurası (ARGTMŞ) artıq 19 ildir fəaliyyət göstərir və sıralarında 111 gənclər təşkilatını birləşdirir. Təşkilat fəaliyyətinin bütün mərhələlərində üzvləri ilə birlikdə Azərbaycanda könüllülük fəaliyyətinin inkişafına mühüm töhfələr verib. Şura 2013-cü ildən qəbul edilən “3G” strategiyası çərçivəsində bu anlayışın yerli və beynəlxalq səviyyədə inkişafında yeni nailiyyətlər əldə edib. Təşkilatın bu istiqamətdə beynəlxalq fəaliyyəti çərçivəsində 2013-cü ildə İtaliyadan olan könüllü gənc ARGTMŞ-nin fəaliyyətinə cəlb olunub və təşkilatın təcrübəsindən faydalanıb. Bununla da ARGTMŞ tərəfindən beynəlxalq könüllü mübadiləsinin həyata keçirilməsinin əsası qoyulub. Təşkilat bu istiqamətdə fəaliyyətini daha da genişləndirərək 2013-cü ildə Avropa Könüllülük Xidməti üzrə akkreditasiya sertifikatı əldə edərək rəsmi olaraq könüllülərin beynəlxalq mübadiləsini həyata keçirmək hüququ qazanıb.

ARGTMŞ, həmçinin könüllülük anlayışı sahəsində xarici təcrübənin Azərbaycanda yayılmasına nail olub. Şura Avropa Könüllülük Xidməti əsasında “Azərbaycan Könüllülük Xidməti” (AKX) proqramını həyata keçirib.

- “Azərbaycan Könüllülük Xidməti” proqramı ölkəmizdə könüllü fəaliyyətinin inkişafına necə dəstək göstərir?

- Gənclər və İdman Nazirliyinin dəstəyi ilə Gənclər Təşkilatları Milli Şurası tərəfindən Azərbaycanda ilk dəfə həyata keçirilən “Azərbaycan Könüllülük Xidməti” proqramı ölkəmizdə mövcud olan könüllülük anlayışını inkişaf etdirməklə həm də könüllülüyün inkişafında yeni mərhələyə qədəm qoyub.

“Azərbaycan Könüllülük Xidməti” proqramı çərçivəsində respublikamızda ilk dəfə regionlararası könüllü mübadiləsi həyata keçirilib. Proqram çərçivəsində Balakən, Goranboy, Göygöl, Şəmkir, Tərtər, Yevlax, Zərdab, Sabirabad, Mingəçevir, Qusar, Quba, Lənkəranın və Bakının Suraxanı, Sabunçu və Xəzər rayonlarının Gənclər evləri və mərkəzlərindən olan 20 gənc bir ay müddətində digər bir rayonun Gənclər evi və mərkəzlərində könüllü olaraq fəaliyyət göstərib.

Könüllülər tərəfindən yerli gənclərin iştirakı ilə bir sıra təlimlər, kurslar və tədbirlər təşkil olunub. Bu, bir tərəfdən Azərbaycanın müxtəlif regionlarından olan gənclər arasında təcrübə, bilik mübadiləsini həyata keçirib, digər tərəfdən isə Gənclər evi və mərkəzlərinə marağı artırıb.

- Bu sahədə ARGTMŞ hansı layihə və proqramların həyata keçirilməsini planlaşdırır?

- Artıq cari ili yekunlaşır və qarşıdan yeni fəaliyyət ili gəlir. Növbəti ildə də ARGTMŞ-nin könüllülüklə bağlı mövcud proqramları ilə yanaşı, bu fəaliyyət üç mühüm istiqamət üzrə dəstəklənəcək. Gənclər həmişə olduğu kimi, təşkilatın fəaliyyətində könüllü iştirak etməklə həm şəxsi peşəkarlıqlarını artırmaq, həm də qurumun həyata keçirdiyi yerli və beynəlxalq könüllülük proqramlarından faydalanmaq imkanı əldə edəcəklər. Həmçinin 2015-ci ildə bu sahədə əsas istiqamətlərdən biri də kəndlərdə yaşayan gənclər arasında könüllülük fəaliyyətini təbliğ etmək, bununla da onların fəallığını artırmaq, istedadlarını üzə çıxarmaq və həmin gənclərin inkişafına nail olmaqdır.