Gəncədə 20 Yanvar faciəsinin ildönümü Şəhidlər xiyabanında keçirilən anım mərasimində qeyd edilmişdir
Gəncə, 20 yanvar (AZƏRTAC). 20 Yanvar faciəsinin 22-ci ildönümü Gəncədə qeyd edilmişdir.
Yanvarın 20-də minlərlə şəhər əhalisi yenicə abadlaşdırılmış Şəhidlər xiyabanına toplaşaraq torpaqlarımızın bütövlüyü uğrunda şəhid olanların xatirəsini yad etmişlər. Onlar şəhid məzarlarının üzərinə tər qərənfillər düzmüşlər.
Gəncə Şəhər İcra Hakimiyyətinin başçısı Elmar Vəliyev çıxış edərək 1990-cı ildə rus imperiyası tərəfindən Bakıda törədilən cinayətləri bir daha yada salmış və həmin dövrdə respublikaya rəhbərlik edənlərin cinayət əməllərini faktlarla mərasim iştirakçılarının diqqətinə çatdırmışdır.
Qarabağ Müharibəsi Əlilləri və Şəhid Ailələri İctimai Birliyinin sədri Almaz Aşurov, şəhid İmamverdi Hüseynovun həyat yoldaşı Aygün Hüseynova və başqaları o qanlı gecənin dəhşətlərindən danışmış, müstəqil Azərbaycan dövlətində qazanılan uğurlardan söhbət açmışlar.
Saat 12-də şəhərdə avtomobillərin hərəkəti dayandırılmış, şəhidlərin xatirəsi bir dəqiqəlik sükutla yad edilmişdir.
Bölmənin digər xəbərləri
