Gəncənin Hacıkənd qəsəbəsində “Nizami Gəncəvi: sələflər və xələflər” parkı açılıb
Gəncə, 16 iyun, Rauf Hacıyev, AZƏRTAC
Səfalı təbiəti və əlverişli turizm imkanları ilə seçilən Hacıkənd qəsəbəsində Azərbaycan ədəbiyyatının və tarixinin böyük bir hissəsini özündə əks etdirən “Nizami Gəncəvi: sələflər və xələflər” adlı parkın açılışı olub.
AZƏRTAC-ın bölgə müxbiri xəbər verir ki, açılış mərasimində Gəncə Şəhər İcra Hakimiyyətinin başçısı Elmar Vəliyev, şəhər ziyalıları, qəsəbə sakinləri və ictimaiyyətin tanınmış nümayəndələri iştirak ediblər.
Tədbirdə çıxış edən Elmar Vəliyev son illər Gəncə şəhərində bir çox tarixi abidələrin bərpa edildiyini, yeni muzeylərin, mədəniyyət mərkəzlərinin yaradıldığını, görkəmli ictimai-siyasi, mədəniyyət xadimlərinin xatirəsinin əbədiləşdirildiyini, həmçinin şəhərin qədim tarixinin, zəngin mədəniyyətinin təbliği istiqamətində böyük işlər görüldüyünü diqqətə çatdırıb.
Bildirilib ki, ölkəmizin ən safalı istirahət məkanlarından olan Göygöl Milli Parkına ötən il 40-a yaxın ölkədən çoxlu qonaq və turist gəlib. Xarici qonaqlar həm də Hacıkənddə olub, bu yerlərin füsunkar mənzərəsini seyr ediblər.
İcra hakimiyyətinin başçısı qeyd edib ki, Hacıkənd qəsəbəsinin mərkəzində parkın salınmasında məqsəd bu ərazidə yaşıllıq və mikroiqlim mühiti yaratmaqla yanaşı, Azərbaycanın milli-mənəvi dəyərlərinin yaradılmasında və onların qorunmasında böyük xidmətləri olmuş şəxsiyyətləri, ictimai-siyasi və mədəniyyət xadimlərini, böyük filosofları, eləcə də tarixi qəhrəmanları təbliğ etmək, Gəncənin qədim Şərqin mədəniyyət mərkəzi kimi zəngin tarixi-mədəni irsə malik olduğunu bu bölgəyə istirahətə gələn yerli və xarici turistlərə göstərməkdir.
Məlumat verilib ki, bu məqsədlə parkda geniş tikinti işləri aparılıb. Parka suvarma sistemi çəkilib, burada ağac və gül kolları əkilib. Parkın yuxarı hissəsində postament üzərində dahi Azərbaycan şairi Nizami Gəncəvinin heykəli ucaldılıb. Abidənin qarşısında Nizami Gəncəvidən əvvəl və sonra yaşamış digər şair və yazıçıların, alim və filosofların, tarixi və əfsanəvi qəhrəmanların heykəlləri qoyulub.
Parkda əfsanəvi sərkərdə Əfrasiyab, müsəlman şərqinin ilk qadın şairəsi Məhsəti Gəncəvi, görkəmli şair və alimlər Ömər Gənci, Əbül-üla, Əsəd, Rəziyyə, Qivami Mütərrizi, Siti, Əbubəkr Gəncəvilər, Nizami Gəncəvinin xələfləri sayılan Doxtəri Xətibi Gəncə, Doxtəri Həkim Gav, Mühasib Gəncəvi, Mirzə Şəfi Vazeh, Şeyx İbrahim Qüdsi və Şeyx Zamanın, eləcə də Gəncənin yadelli işğalçıların istilasına qarşı inadla müqavimət göstərən Usta Bəndər kimi 17 görkəmli tarixi şəxsiyyətin heykəli ucaldılıb. Parkdakı bütün heykəllərin müəllifi heykəltəraş Asəf Həsənovdur.
Həmçinin parkda Gəncənin tarixi haqqında geniş məlumat lövhəsi qoyulub.
Gələcəkdə parkın ərazisinin daha da genişləndiriləcəyini deyən Elmar Vəliyev bildirib ki, Gəncədə anadan olan, yaxud bu şəhərdə yaşayıb-yaradan görkəmli tarixi şəxsiyyətlərin irsinin araşdırılması istiqamətində hazırda AMEA-nın Gəncə Bölməsində elmi tədqiqat işləri davam etdirilir. Parkın genişləndirilən ikinci hissəsində dünyanın qədim kitabxana və əlyazma institutlarında saxlanılan və həmin mənbələrdə adları qeyd edilmiş, Gəncə ədəbi-mədəni mühitinə aid olan digər görkəmli doqquz şəxsiyyətin heykəli ucaldılacaq.
Filologiya üzrə elmlər doktoru, Gəncə Dövlət Universitetinin professoru, Nizamişünas Xəlil Yusifli burada heykəli ucaldılan şəxslər haqqında söhbət açaraq, onların həyat və fəaliyyətləri barədə maraqlı faktlar səsləndirib. Parkı açıq səma altında muzeyə bənzədən alim bildirib ki, bundan sonra Hacıkəndi ziyarət edən hər kəs burada istirahət etməklə yanaşı, həm də Azərbaycanın dahi şəxsiyyətləri haqqında məlumat əldə edəcək.
Tədbirin sonunda “Nizami Gəncəvi: sələflər və xələflər” parkının inşasında göstərdikləri xidmətlərə görə bir qrup şəxsə Gəncə Şəhər İcra Hakimiyyəti başçısının fəxri fərmanı və xatirə hədiyyələri təqdim olunub.
Bölmənin digər xəbərləri
