Geosiyasi oyunlar naminə Qafqaza soxulmağa çalışan Fransa regiondan daha da təcrid olur ŞƏRH
Bakı, 5 yanvar, AZƏRTAC
Fransa bütün beynəlxalq platformalarda Ermənistandan rupor kimi yararlanmağa çalışır. Bu ölkədə isə Ermənistanı Qafqaza giriş qapısı kimi görürlər. Rəsmi Paris, həmçinin Ermənistanı məcburi şəkildə istismar edərək onu Rusiya forpostluğundan çıxarmağa cəhdlər göstərir, İrəvandan ona qarşı oyuncaq kimi istifadə etmək istəyir.
Dekabrın 20-21-də Fransa və Ermənistan Laçın yolundakı vəziyyətlə bağlı Birləşmiş Millətlər Təşkilatında (BMT) Təhlükəsizlik Şurasının(TŞ) iclasını çağırdılar. Hər iki ölkə Azərbaycana qarşı növbəti ədalətsizliyi qlobal platformada legitimləşdirməyə cəhd etsə də, növbəti dəfə rüsvay oldu. Bunu da Azərbaycanın növbəti siyasi qələbəsi kimi qiymətləndirə bilərik. Ölkəmiz bundan sonra da Fransanı diplomatik müstəvidə “nokaut etməyə” davam edəcək.
Bu fikirləri AZƏRTAC-a açıqlamasında politoloq Tural İsmayılov söyləyib.
Politoloq qeyd edib ki, Fransanın bütün bəşəri və insani dəyərləri tapdalayaraq beynəlxalq hüququ manipulyasiya etmək cəhdləri mütəmadi hal alıb. Belə ki, 2022-ci ilin sentyabr hadisələrindən sonra Ermənistanın müraciəti əsasında BMT Təhlükəsizlik Şurasının iclasının gündəliyinə “Ermənistanın BMT yanında Daimi nümayəndəsinin məktubu” adlı bənd daxil edilmişdi. Sözügedən müraciət əsasında Təhlükəsizlik Şurasının iclasının gündəliyinə bəndin daxil edilməsi Fransanın dəstəyi olmadan baş verə bilməzdi. Fransa Ermənistan vasitəsilə Azərbaycana və Türkiyəyə təzyiqlər göstərməyə çalışırdı. Bunun özü ayrıca bir haqsızlıqdır ki, BMT TŞ-nin 4 qətnaməsi ola-ola 30 ilə yaxın dövr ərzində bu qurum Ermənistanın Azərbaycana qarşı təcavüzü ilə bağlı bir dəfə də olsun toplantı keçirmədi. Buna mane olanların biri də məhz Fransa idi. BMT TŞ-ni ədalətsizliklər meydanına çevirmək cəhdi isə beynəlxalq hüquq adına daha bir utancdır. Fransa-Ermənistan cütlüyü nə ötən ilin sentyabrında, nə də dekabrında BMT TŞ-də Azərbaycan əleyhinə istədikləri bəyanatları qəbul etdirə bilmədilər.
“Dekabrın 20-21-dəki müzakirələrdən dərhal sonra Fransa BMT TŞ-nin daimi üzvü və hazırda qurumun sədri kimi Laçın-Xankəndi yolundakı vəziyyəti “humanitar fəlakət” kimi təqdim edən riyakar və tam ermənipərəst mətn hazırlamışdı. On gündür ki, mətn üzərində böyük mübarizə gedirdi. Prosesləri bilavasitə Fransa Prezident Administrasiyası və Makronun xarici siyasət məsələləri üzrə müşavirləri idarə edirdilər. Təsadüfi deyil ki, Prezident İlham Əliyev Qərbi Azərbaycan İcmasının üzvləri ilə görüşdə bir sıra beynəlxalq təsisatlarda Azərbaycana qarşı məkrli işlərin aparıldığına işarə etmişdi. Bundan əvvəl isə Frankofoniya və bəzi başqa beynəlxalq təşkilatlarda Azərbaycan əleyhinə fəaliyyətlərin təəssüf doğurduğunu diqqətə çatdırmışdı. Fransa düşünürdü ki, bu bəyanatı qəbul etdirəcək və bundan sonra növbəti addım kimi onu qətnaməyə çevirəcək. Lakin bu baş vermədi”, - deyə T.İsmayılov bildirib.
O vurğulayıb ki, bu proses Fransa üçün sözün əsl mənasında, böyük rüsvayçılıq oldu. Belə ki, BMT TŞ-nin daimi üzvü və hazırda onun sədri olan bu ölkə 10 gündür bütün resurslarını işə salsa da, bir bəyanatı qəbul etdirə bilmədi. Əvvəla, bəyanat fransızların ilkin təqdim etdiyi layihədən fərqli olaraq əsaslı dərəcədə dəyişdirildi. Ermənipərəst tərzdə təşkil olunmuş sənəddən “Dağlıq Qarabağ” ifadəsi çıxarıldı, “humanitar yardım olarsa, bu, yalnız Azərbaycanın ərazi bütövlüyü və suverenliyinə hörmət əsasında ola bilər” və “Azərbaycanın ərazi bütövlüyünə dəstək” kimi ifadələr daxil edildi. Azərbaycan diplomatiyası bütün imkanlarından istifadə edərək Fransanı məhz onun öz meydanında rüsvayçılıqla baş-başa qoydu.
Ekspert vurğulayıb ki, Fransanın hazırladığı 6-cı və ya 7-ci mətn BMT Təhlükəsizlik Şurasının qaydalarına uyğun olaraq yenidən sükut proseduruna qoyulmuşdu. Bu o deməkdir ki, sənəd hazırlanır və konkret saata qədər vaxt müəyyən edilir. İrad və ya təklif yoxdursa, qəbul edilmiş hesab olunur. Bu sənəd də uğursuz oldu. Beynəlxalq ictimaiyyət, BMT TŞ-nin daimi və qeyri-daimi üzvləri də Fransanın necə ədalətsiz, qərəzli və riyakar olduğunu gördülər və bunu açıq etiraf etdilər. Belə iyrənc fəndlərlə geosiyasi oyunlar naminə Qafqaza soxulmağa çalışan Fransa başa düşməlidir ki, hər belə addımı ilə regiondan daha da təcrid olur.
“Yuxarıda adını çəkdiyimiz sənədin qəbul edilməməsi 2023-cü il ərəfəsində dövlətimizin başçısının növbəti qələbəsi və Azərbaycan xalqına hədiyyəsi oldu. Bu parlaq Qələbə Prezident İlham Əliyevin qətiyyətini və liderlik keyfiyyətlərini növbəti dəfə əyani nümayiş etdirdi”, - deyə politoloq diqqətə çatdırıb.
Bölmənin digər xəbərləri
