GERHARD ŞRÖDER BUNDAN SONRA NƏ İLƏ MƏŞĞUL OLACAQ?

15.11.2005 [20:32]
Çap et
A⁺ A^-

AZƏRTAC İndependent Onlayn agentliyinə istinadla xəbər verir ki, sonuncu seçkilərdə uduzan AFR Kansleri Gerhard Şröder noyabrın 22-də hakimiyyəti Angela Merkelə təhvil verdikdən sonra hüquq praktikası ilə məşğul olacağını və hakimiyyətdə keçirdiyi illər haqqında xatirələr yazacağını bildirmişdir.

Şröder “Sayt” (“Zaman”) qəzetinə müsahibəsində dəqiqləşdirmişdir ki, Almaniyanı yeddi il ərzində necə idarə etdiyi haqqında kitab artıq gələn ilin payızında işıq üzü görməlidir. O, xüsusi vurğulamışdır ki, iri hüquq agentliyi yaratmaq, eləcə də ölkənin məşhur konsernlərinin direktorlar şurasında işləmək niyyətində deyildir.

Bütün bunlara baxmayaraq, sabiq kansler siyasətdən getməyəcək, çünki Bundestaqın deputatı yerini istənilən halda özündə saxlayacaqdır.

Xatırladaq ki, Gerhard Şröder böyük siyasətə gəlməzdən əvvəl doğma Hannover şəhərində hüquqşünas işləmişdir.