GORANBOYDA 2005-Cİ İLİN YEKUNLARI MÜZAKİRƏ EDİLMİŞDİR
Müşavirə iştirakçıları, əvvəlcə, rayon mərkəzində ümummilli liderimiz Heydər Əliyevin qranitdən ucaldılmış abidəsi önünə əklil qoyaraq, ulu öndərin xatirəsinə ehtiramlarını bildirmişlər. Sonra müşavirə mərkəzi mədəniyyət sarayında öz işini davam etdirmişdir. Goranboy Rayon icra Hakimiyyətinin başçısı Novruz Novruzov 2005-ci ildə görülən işlərə dair hesabat məruzəsi ilə çıxış etmişdir. Qeyd olunmuşdur ki, əvvəlki illərdə olduğu kimi, keçən il də əsası ümummilli liderimiz Heydər Əliyev tərəfindən qoyulmuş və ölkə Prezidenti İlham Əliyev tərəfindən uğurla davam etdirilən sosial-iqtisadi strategiya proqramı Goranboy rayonunda da müvəffəqiyyətlə həyata keçirilir. Məhz bunun nəticəsidir ki, ötən il rayonda orta aylıq əmək haqqı 190 min manatdan 236,2 min manata yüksəlmişdir. 2005-ci ildə rayonda məhsul istehsalının və xidmətlərin ümumi həcmi 425 milyard manat (köhnə pulla) olmuşdur ki, bu da əvvəlki ilə nisbətən 60 milyard manat çoxdur. Əhalinin məşğulluğunun təmin edilməsi istiqamətində həyata keçirilən məqsədyönlü tədbirlərin nəticəsində təkcə keçən il rayonda 3215 daimi iş yeri açılmışdır.
Rayon iqtisadiyyatının aparıcı sahəsi olan kənd təsərrüfatının inkişafı istiqamətində qazanılan uğurlardan danışan natiq qeyd etmişdir ki, hazırda aqrar bölmədə çalışanların sayı 28 min 60 nəfərdir ki, bu da əvvəlki ilə nisbətən 1760 nəfər çoxdur. Bu sahənin inkişafına göstərilən diqqətin nəticəsində keçən il kənd təsərrüfatında ümumi məhsul istehsalı 9,9 faiz artmışdır. Sənaye təməlinə əsaslanan pambıqçılığın inkişafında müəyyən irəliləyişlər müşahidə olunur. Ötən il 2004-cü ilə nisbətən 130 hektar sahədə artıq pambıq əkilərək 3226 ton məhsul tədarük edilmişdir ki, bunun da nəticəsində 3 milyard 226 milyon manat gəlir əldə edilmişdir. Ət, süd, taxıl və tərəvəz istehsalında da nəzərəçarpacaq yüksəlişə nail olunmuşdur. Kənd təsərrüfatında işlərin dinamik inkişafını təmin etmək məqsədi ilə aqrar bölmədə çalışanların texnika ilə təminatı daim diqqət mərkəzində saxlanılır. Məhz bunun nəticəsidir ki, son 3 ildə kənd təsərrüfatı ilə məşğul olan ayrı-ayrı hüquqi və fiziki şəxslər tərəfindən 5 adda 18 yeni texnika alınmışdır.
Sahibkarlığın inkişafına dövlət qayğısından danışan natiq son illər bu sahədə qazanılan uğurları da diqqətə çatdırmışdır. Qeyd olunmuşdur ki, keçən il rayonda 13 iri istehsal və xidmət sahəsi yaradılmış, 3 müəssisənin fəaliyyəti bərpa edilmiş, 355 kiçik ticarət və xidmət sahəsi açılmışdır ki, bunun da nəticəsində özəl bölmədə çalışanların sayı 30 min 743 nəfərə çatmışdır. Bu gün rayonda tikilməkdə olan, özülü keçən il mayın 19-da möhtərəm Prezident İlham Əliyev tərəfindən qoyulan Goranboy gips zavodu mart ayında istifadəyə verildikdən sonra bu rəqəmin xeyli artacağı da nəzərə çarpdırılmışdır.
Müşavirədə salonda qoyulmuş mikrofonlar vasitəsilə qaz, su və elektrik enerjisi təminatında yaranmış problemlərin həlli istiqamətində müşavirə iştirakçılarının arzu və təklifləri də dinlənilmişdir. Səhiyyə və təhsil sistemində aparılan yenidənqurma işlərindən söhbət aparılarkən dövlət başçısına və eləcə də Heydər Əliyev Fondunun prezidenti YUNESKO-nun xoşməramlı səfiri, Milli Məclisin deputatı Mehriban xanım Əliyevaya minnətdarlıq ifadə olunmuşdur.
Müşavirədə rayon qaz-istismar idarəsinin rəisi İlham Məmmədov, rayon təhsil şöbəsinin müdiri Elmar Əliyev, rabitə qovşağının rəisi Hafiz Muxtarov, əmək və müharibə veteranı Adil Abbasov və başqaları çıxış edərək, 2005-ci ildə görülən işlərdən və işdə yol verilən nöqsanlardan danışmışlar. Respublika rabitə və informasiya texnologiyaları naziri, akademik Əli Abbasov müşavirədə çıxış etmişdir. 2006-cı ildə qarşıda duran vəzifələrin həllinə yönəldilmiş tədbirlər planı təsdiq edilmiş və respublika Prezidenti İlham Əliyevə müraciət qəbul olunmuşdur. Prezidentin İcra Aparatının məsul işçisi Habil Əzəmmətov müşavirənin işində iştirak etmişdir.
Bölmənin digər xəbərləri
