Güclü ordu xalqın birliyi və milli ruh üzərində formalaşır ŞƏRH
Bakı, 10 noyabr, AZƏRTAC
Azərbaycan aviasiyası Vətən müharibəsindən sonra dünyada baş verən proseslər, həmçinin İsrail-İran, Rusiya-Ukrayna, Pakistan-Hindistan müharibələri fonunda tələbata uyğun olaraq gücləndirilib. Azərbaycan Silahlı Qüvvələri Ermənistanla müqayisədə deyil, dünyada güc balansının saxlanılması məqsədilə öz aviasiya döyüş təyyarələrini dəyişməyə zərurət bilib. Artilleriya qurğusu, eləcə də pilotsuz uçuş aparatları, yüksək dəqiqliklə zərbələr endirən supersonik sürətli raketlərin əldə edilməsi Cənubi Qafqaz regionunda orta dəhlizin enerji daşıyıcı vasitələrinin təhlükəsizliyi, eləcə də Asiya ilə Avropa arasındakı etibarlı logistikanın təşkil edilməsi üçün həyata keçirilir.
Bu fikirləri AZƏRTAC-a açıqlamasında Həmvətənlərə Dəstək İctimai Birliyinin təsisçisi, ehtiyatda olan polkovnik-leytenant, hərbi-siyasi ekspert Elmar Hüseyn səsləndirib.
Zəfər Günündə keçirilən hərbi paradı şərh edən ekspertin sözlərinə görə, Azərbaycan bölgədə, eləcə də şimalda və cənubda olan ölkələrlə qonşuluq təmasında tarixin keçmiş zərurətlərinə söykənərək addımlar atmaq məcburiyyətindədir: “Son müharibələrə baxsaq görərik ki, günün birində elan olunmadan şəhərlər, kəndlər, strateji obyektlər, mülki müəssisələr raketlə vurulur. Hətta açıq şəkildə qeyd edə bilərik ki, 44 günlük Vətən müharibəsində Ermənistan silahlı qüvvələri tərəfindən və onlara havadarlıq edən qüvvələr tərəfindən Azərbaycana “İsgəndər-M” raketləri atılıb. Azərbaycan və Bakı ərazisi, eləcə də Mingəçevir Su Elektrik Stansiyasında əvvəlcədən S-300, S-400 tipli uzaqmənzilli hava hücumundan müdafiə vasitələrinin olması kütləvi qırğınların, təhlükəli, belə desək, strateji səviyyədə böhran vəziyyətinin yaradılmasının qarşısını almışdı. Bu da ölkəmizin əvvəlcədən düşünülmüş addımı idi. Dövlətimiz düşmənin hansı istiqamətdə hansı növ silahlardan istifadə edə biləcəyini təyin etmək iqtidarında idi”.
E.Hüseynov qeyd edib ki, Xüsusi Təyinatlı Qüvvələrin modernləşməsi zamanın tələbi idi: “1997-ci ildə yaranmış Xüsusi Təyinatlı Qüvvələr Prezident İlham Əliyev tərəfindən 2023-cü ildə müasirləşdirildi. Modernləşdirmə 2016-cı ilin Aprel döyüşlərindən sonra daha sürətlə aparıldı. 44 günlük Vətən müharibəsi, həmçinin müdafiə mövqelərinin qorunmasına baxmayaraq, Xüsusi Təyinatlı Qüvvələrinin yerinə yetirdiyi tapşırıqların dəyərləndirilməsi baxımından önəmli oldu. Belə desək, lokal antiterror tədbirlərinə qədər yaradılan komanda birliklərinin effektivliyini biz birsutkalıq döyüşdə bir daha gördük. O zaman Azərbaycan Silahlı Qüvvələrində iki minə yaxın xüsusi təyinatlı qüvvələr var idi. İndi isə hərbi paradda dörd minə yaxın xüsusi təyinatlı iştirak edib”.
“Bütün bunları nəzərə alaraq deyə bilərik ki, güclü ordu müstəqilliyi, regionun təhlükəsizliyini, güc balansının bərabərləşdirilməsini təmin edir. Güclü ordu quruculuğu xalqın birliyi və milli ruh üzərində formalaşan vətənpərvərlik tərbiyəsi ilə həyata keçilir. Azərbaycan Ordusu aparılan islahatlar, eləcə də müasir texnikaların gətirilməsi ilə yanaşı, hazırkı dövrdə Azərbaycan gənclərinin hərbi vətənpərvərlik mövzusunun strateji səviyyədə təbliğ olunması ilə müşayiət olunur. Ordumuzun gücü təhlil edilir və gələcək nəsillərə çatdırılır. Bu, böyük bir güc, balans, hərbi-siyasi iradə və dəstək sayəsində mümkün olub”, - deyə o bildirib.
Ekspert əlavə edib ki, bu paradda Pakistan Silahlı Qüvvələrinin nümayəndə heyətinin iştirakı, Türkiyədən gəlmiş parad heyətinin iştirakı böyük bir uğurdur: “2026-cı ildə Türk Dövlətləri Təşkilatının hərbi təlimləri Azərbaycanda keçiriləcək və düşünürəm ki, bu, Orta Dəhlizin təhlükəsizliyi, bu dövlətlərin ortaq təhlükəsizliyinin təminatıdır. Ümidvaram ki, növbəti beşillikdə Türk Dövlətləri Təşkilatının ölkələri də hərbi paradımıza qoşulacaqlar”, - deyə o vurğulayıb.
Bölmənin digər xəbərləri
