Gürcüstan kibercinayətkarlığa qarşı mübarizəni gücləndirir
Tbilisi, 23 dekabr, AZƏRTAC
Gürcüstan cinayətkarlığın, xüsusən də kibercinayətkarlığın qarşısını almaq üçün ciddi tədbirlər görəcək. Bu tədbirlərdən biri də kibercinayətkarlığa qarşı mübarizə polisinin yaradılması olacaq.
AZƏRTAC xəbər verir ki, bu barədə Gürcüstanın daxili işlər naziri vəzifəsini icra edən Vaxtanq Qomelauri parlamentdəki çıxışı zamanı məlumat verib.
Onun sözlərinə görə, Gürcüstanın bütün iri şəhərlərində kibercinayətkarlıqla mübarizə üzrə polis bölmələri yaradılacaq.
Bu bölmələr xüsusi proqram təminatı və texniki vasitələrlə təchiz olunacaq. Kibercinayətkarlıqla mübarizənin effektivliyini artırmaq məqsədilə qanunvericilik bazası gücləndiriləcək, Avropa və ABŞ-ın cinayətkarlığın bu növü ilə mübarizədə aparıcı qurumları ilə operativ əməkdaşlıq dərinləşdiriləcək.
Bildirilib ki, bu il ölkədə 152 kibercinayətkar saxlanılaraq cinayət məsuliyyətinə cəlb olunub. İllik müqayisədə bu kateqoriyaya aid qanunsuz əməllərin sayı 24 faiz artıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
