GÜRCÜSTAN PREZİDENTİ “AKKORD” ŞİRKƏTLƏR QRUPUNUN 2 ƏMƏKDAŞINI MÜKAFATLANDIRMIŞDIR
Tbilisi, 8 dekabr (AZƏRTAC). Gürcüstan Prezidenti Mixeil Saakaşvili dekabrın 8-də Tbilisinin Avlabari yaşayış məhəlləsindəki Prezident Sarayında yol tikintisində fərqlənmiş əməkdaşları mükafatlandırmışdır.
Prezident son illər ölkənin əksər sahələrdə qazandığı uğurları diqqətə çatdırmış, yol tikintisinin yeni mərhələyə qədəm qoyduğunu bildirərək bunu geosiyasi inqilab adlandırmışdır. M.Saakaşvili demişdir ki, keyfiyyətli yol tikintisi yeni iş yerləri yaradılması ilə yanaşı, ölkə iqtisadiyyatının yüksəlişini də təmin edəcək, Tbilisi şəhəri ilə bölgələr arasında rahat, vaxt itirmədən əlaqə yaradılmasında vacib rol oynayacaqdır.
Prezident Gürcüstanın Azərbaycan, Türkiyə və İsrailin yol inşaatçıları ilə yaxşı əlaqəsi olduğunu vurğulamışdır. M.Saakaşvili yol tikintisində fərqlənən bir neçə nəfəri, o cümlədən Gürcüstan yol Departamentinin rəhbəri Ramazan Nikolaişvilini “Şərəf” ordeni ilə mükafatlandırmışdır. Mükafatlandırılanlar arasında Azərbaycan Respublikasının “Akkord” şirkətlər qrupunun rəhbəri İlqar Hacıyev və şirkətin idarə heyəti sədrinin müavini Elçin Ağayev də vardır. Onlar şirkətin Gürcüstanda yol tikintisi sahəsində qazandığı uğurlara görə “Şərəf” ordeninə layiq görülmüşlər.
Xatırladaq ki, “Akkord” şirkətlər qrupu Dünya Bankının elan etdiyi tenderdə qalib gəlmiş və Gürcüstanın Şida (Daxili) Kartli bölgəsində körpülər, yeraltı keçidlər və beton yollar salınmasına dair layihələri həyata keçirir.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
