GÜRCÜSTAN PREZİDENTİ MİXAİL SAAKAŞVİLİ ABŞ-DA SƏFƏRDƏDİR
AZƏRTAC-ın müxbirinin Vaşinqtondan verdiyi xəbərə ğörə, burada işgüzar səfərdə olan Gürcüstan prezidenti Mixail Saakaşvili ABŞ-ın rəsmi şəxsləri ilə beynəlxalq terrorizmlə mübarizə problemini müzakirə etmişdir. Pentaqondakı görüşdə Gürcüstan hərbi qulluqçularının İraqda koalisiya qüvvələrinin əməliyyatlarında iştirak etməsi məsələsi də müzakirə olunmuşdur. ABŞ-a səfərdə Mixail Saakaşvilini müşayiət edən Gürcüstan nümayəndə heyətinin üzvləri də hərbi-strateji məsələlərə və terrorizmlə mübarızə problemlərinə üstünlük veriləcəyini əvvəlcədən müəyyənləşdirmişlər. Nümayəndə heyətinə xarici işlər naziri Tedo Caparidze ilə yanaşı, müdafiə naziri Gela Bejuaşvili və daxili işlər naziri Georgi Baramidze də daxil edilmişdir.
Gürcüstan prezidentinin dövlət katibi Kolin Pauellə, ABŞ prezidentinin milli təhlükəsizlik məsələləri üzrə köməkçisi Kondoliza Raysla və ölkənin digər rəsmi şəxsləri ilə görüşləri nəzərdə tutulmuşdur.
Çərşənbə günü Mixail Saakaşvilini Ağ Evdə ABŞ prezidenti Corc Buş da qəbul edəcəkdir.
Bölmənin digər xəbərləri
