Gürcüstan Prezidentinin müşavirləri bu ölkənin ali məktəblərində təhsil alan azərbaycanlı tələbələrlə görüşmüşlər

10.06.2014 [21:45]
Çap et
A⁺ A^-

Tbilisi, 10 iyun (AZƏRTAC). Gürcüstan Prezidentinin mətbuat xidmətindən verilən məlumata görə, Prezidentin milli azlıqların məsələləri üzrə müşaviri Sofiya Şamanidi və beynəlxalq münasibətlər üzrə müşaviri İvane Maçavariani ölkənin ali məktəblərində təhsil alan azərbaycanlı tələbələrlə görüşmüşlər. Onlar gənclərə Avropaya inteqrasiya prosesləri, Gürcüstanın Avropa İttifaqı ilə Assosiasiya Sazişini imzalaması, ölkənin bundan əldə edəcəyi fayda və başqa məsələlər barədə ətraflı məlumat vermişlər.

Müşavirlər bununla əlaqədar ölkənin milli azlıqların məskunlaşdığı bölgələrində geniş təbliğat işləri aparılmasının vacibliyini qeyd etmiş və gənclərin buna cəlb olunmasının əhəmiyyətini vurğulamışlar.

İyunun sonunda Prezident Administrasiyasının nümayəndələri azərbaycanlı tələbələrlə birlikdə soydaşlarımızın yığcam yaşadıqları Kvemo Kartli-Borçalı bölgəsinə gedib sakinlərə ana dillərində bu məsələyə həsr olunmuş bukletlər paylayacaqlar.

Tələbələr görüşdən razı qaldıqlarını bildirmiş, bunun davam etdirilməsini arzulamışlar.

İslam Əliyev

AZƏRTAC-ın xüsusi müxbiri

Tbilisi