GÜRCÜSTAN SAKİNİ 92 YAŞLI SƏMƏNGÜL RƏSULOVA HEYDƏR ƏLİYEVİN MƏZARINI ZİYARƏT ETMİŞDİR
Azərbaycan xalqının böyük oğlu, ümummilli liderimiz Heydər Əliyevin əziz xatirəsini Gürcüstan azərbaycanlıları da daim yad edirlər. Marneuli rayonundakı Qullar kənd sakini 92 yaşlı Səməngül Rəsulovanın bu günlərdə Bakıya gedib, Heydər Əliyevin məzarını ziyarət etməsi bunun təsdiqidir. Səməngül nənə böyük itkidən kədərləndiyini bildirir və kiçik pensiyasını toplayıb özünə yol pulu edərək Bakıya gedib ümummilli liderin qəbrini ziyarət etməklə təsəlli tapdığını söyləyir.
Dünya görmüş bu ağbircək Bakıda olarkən Azərbaycan Prezidenti İlham Əliyevin adına ərizə yazıb tənha, imkansız qocaya yardım göstərilməsini xahiş etmişdir.
Məsələni yoluna qoymaq Gürcüstanda səxavətli xeyriyyəçi kimi məşhur olan Şəmkir Rayon İcra Hakimiyyətinin başçısı Aslan Aslanova həvalə edilmişdir. Bu günlərdə Şəmkirdən Səməngül Rəsulovaya ərzaq və pul yardımı göndərilmişdir. Diqqət və qayğıya görə Səməngül nənə Azərbaycan Prezidenti İlham Əliyevə minnətdarlığını bildirmişdir.
Bölmənin digər xəbərləri
