Gürcüstanda dövlət rəsmilərini və siyasi vəzifəli şəxsləri təhqir edənlər ciddi cəzalandırılacaqlar
Tbilisi, 4 fevral, AZƏRTAC
Gürcüstanda dövlət rəsmilərinin, siyasi vəzifəli şəxsin, eləcə də dövlət və ya ictimai qulluqçunun şifahi təhqir edilməsi və ya onlara qarşı digər təhqiredici hərəkətlər inzibati məsuliyyətə səbəb olacaq.
AZƏRTAC xəbər verir ki, bununla əlaqədar ölkənin “İnzibati Xətalar Məcəlləsi”nə əlavələr və dəyişikliklər ediləcək.
Hakim “Gürcü Arzusu-Demokratik Gürcüstan” Partiyası dövlət rəsmilərinin şifahi təhqirinə görə cəzaların tətbiqi məqsədilə “İnzibati Xətalar Məcəlləsi”nə dəyişikliklər olunması ilə bağlı təkliflər hazırlayıb. Yeni qanun layihəsində bu cür hərəkətlər edən şəxsləri 1 500 laridən 4 000 lariyə qədər cərimə gözləyir və ya onlar 45 günədək inzibati həbs olunacaqlar.
İnzibati xətanı törətmiş şəxs ikinci dəfə eyni hərəkəti edərsə, cərimənin məbləği 2500 laridən 6 000 lariyədək dəyişəcək. Eyni zamanda, həmin şəxs və ya şəxslər 5 gündən 60 günədək inzibati həbs cəzası alacaqlar.
Bundan əlavə, xırda xuliqanlıq, polisə müqavimət və icazəsiz mitinqlərin keçirilməsinə görə də sanksiyalar sərtləşdiriləcək.
Qanun layihəsi parlamentə təqdim olunub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
