Gürcüstanda koronavirusun yeni ştammı ilə əlaqədar əhaliyə xəbərdarlıq edildi
Tbilisi, 5 yanvar, AZƏRTAC
“Koronavirusun yeni ştammı daha sürətlə yayılır və daha çox ehtiyat tələb edir”.
AZƏRTAC xəbər verir ki, bu barədə Gürcüstan səhiyyə nazirinin müavini Tamar Qabunia İdarələrarası Koordinasiya Şurasının iclasından sonra keçirdiyi brifinqdə məlumat verib.
Onun sözlərinə görə, hazırkı mərhələdə bu növün gənclərə zərər vermə baxımından çox aktiv olduğunu düşünmək üçün heç bir elmi əsasımız yoxdur. Bununla belə hamı ehtiyatlı olmalıdır. Məhz bu səbəbdən fərdi qoruyucu vasitələrin istifadəsi və mövcud qaydalara riayət edilməsinə daha çox ehtiyac var.
Nazir müavini deyib: “Üç şübhəli hadisədən birində yeni bir virusun mövcudluğu təsdiqləndi, bu da klinik olaraq bilinən virusla eynidir. Bu anda məlum olan yeganə şey yeni ştammın daha sürətlə yayılması və fərdi qoruyucu vasitələrin istifadəsinə, həmçinin iş mühitində və ictimai yerlərdə qaydalara riayət etməyə daha diqqətli olmaqdır”.
T.Qabunia əhaliyə müraciət edərək, bütün tələblərə və qadağalara riayət etməyə çağırıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
