Gürcüstanda plastik qabların dövriyyəsi qadağan edilib
Tbilisi, 1 yanvar, AZƏRTAC
Gürcüstanda birdəfəlik istifadə üçün nəzərdə tutulmuş plastik qabların dövriyyəsi yanvarın 1-dən qadağan edilib. Qadağanın pozulmasına görə maliyyə cərimələri tətbiq olunacaq.
AZƏRTAC xəbər verir ki, bununla əlaqədar Gürcüstan hökuməti qərar qəbul edib.
Qərara əsasən, yanvarın 1-dən plastik materialdan hazırlanmış çəngəllərin, bıçaqların, qaşıqların, çubuqların, boşqabların, pipetlərin, həmçinin genişləndirilmiş polistiroldan hazırlanmış qida konteynerlərinin, onların qapaqlarının, stəkanların və stəkan qapaqlarının istehsalı, idxalı və bazara çıxarılması qadağandır.
Bundan əlavə, iaşə obyektləri tərəfindən müştərilərə plastikdən hazırlanmış, birdəfəlik qida konteynerləri və stəkanlar vasitəsilə hazır yeməklərin təqdim edilməsi və ya satışı da qadağan edilib.
“Qida ilə təmas üçün nəzərdə tutulmuş plastik materiallar və məmulatlar (əşyalar) haqqında texniki reqlamentin” tələblərinin pozulmasına görə 1000 lari məbləğində cərimə və müvafiq məhsulun müsadirəsi nəzərdə tutulub. Qaydanın təkrar pozulması halında isə 2 000 lari məbləğində cərimə və yenə də məhsulun müsadirəsi tətbiq ediləcək.
Müsadirə olunmuş məhsullar Dövlət Əmlakı Milli Agentliyinə təhvil veriləcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
