Gürcüstanda torpaq sürüşməsi və qar uçqunu nəticəsində 5 nəfər ölüb
Tbilisi, 7 fevral, AZƏRTAC
Gürcüstanın Bağdati bələdiyyəsində gecə saatlarında torpaq sürüşməsi baş verib. Nəticədə üç nəfər ölüb, daha altı nəfərin taleyi isə məlum deyil.
AZƏRTAC xəbər verir ki, Nergeti kəndində dörd ev torpaq altında qalıb. Hadisə yerində 200-dən çox xilasedici çalışır. Axtarılanların yarısı uşaqlardır.
Dağlıq Acarıstanda isə qar uçqunu iki nəfərin həyatına son qoyub. Keda Polis İdarəsinin inspektoru Temur Baramidze Tsoniaris kəndindəki evinin xarabalıqları altında qalaraq ölüb. Xuloi bələdiyyəsinin Thilvana kəndində yaşayış binasının dağıntıları altından bir qadının cəsədi çıxarılıb.
Güclü qar və çovğun səbəbindən dağlıq Acarıstanda məktəblər bağlanıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
