Gürcüstanda Xocalı soyqırımı ilə bağlı silsilə tədbirlər keçiriləcəkdir
Bakı, 23 fevral (AZƏRTAC). Gürcüstanda fəaliyyət göstərən Azərbaycanlı Gənclər İttifaqı (AGİ) fevralın 25-də bu ölkənin bir sıra region və şəhərlərində Xocalı soyqırımı ilə bağlı silsilə tədbirlər keçirəcəkdir.
Diasporla iş Üzrə Dövlət Komitəsindən AZƏRTAC-a bildirmişlər ki, Marneuli, Bolnisi və Dmanisidə “Hər bir uşağın yaşamağa haqqı var” şüarı altında keçiriləcək tədbirlərdə Gürcüstanın dövlət rəsmiləri, azərbaycanlı və gürcü ziyalılar, qeyri-hökumət təşkilatlarının və bu ölkədə yaşayan milli azlıqların nümayəndələri iştirak edəcəklər.
Tədbirlərdə AGİ-nin fəalları uşaq bağçalarına hədiyyələr təqdim edəcək, şamlar yandırılacaq, Xocalı soyqırımı haqqında məlumat veriləcək, gənclərin ifasında faciə ilə bağlı ədəbi-bədii kompozisiya nümayiş olunacaqdır. Həmçinin Xocalı soyqırımından bəhs edən foto və kitablardan ibarət sərgilər təşkil olunacaq, sənədli filmlər göstəriləcəkdir.
Bölmənin digər xəbərləri
