GÜRCÜSTANIN BAŞ NAZİRİ ZURAB JVANİYANIN ÇIXIŞI
Əziz xanımlar və cənablar!
Bu gün burada sizin hamınızı, qardaş Azərbaycan xalqını “Əsrin müqaviləsi”nin imzalanmasının əlamətdar 10-cu ildönümü münasibətilə Gürcüstan Prezidenti Mixail Saakaşvilinin adından, Gürcüstan hökuməti adından və şəxsən öz adımdan təbrik edə bildiyimə görə xoşbəxtəm.
Bu gün, 2004-cü ildə biz, sadəcə olaraq, deyə bilərik ki, 10 il əvvəl “Əsrin müqaviləsi” imzanlanmışdır. Zənnimcə, salonda olanların böyük əksəriyyətinin yadındadır ki, bu imzalanmanın baş tutması üçün Azərbaycan xalqının böyük lideri Heydər Əliyev çox mürəkkəb yol – nəticə etibarilə, Azərbaycanın çox böyük ehtiyatlarından, çox zəngin sərvətlərindən istifadə etməsinə imkan vermiş ilkin zəmini, əsasları yaratmaq üçün maneələrlə dolu, əngəllərlə dolu, ziddiyyətlərlə dolu bir yol keçməli olmuşdur. Bu gün biz xüsusilə yaxşı başa düşürük ki, çox kəşməkəşli, çox təlatümlü o illərdə Azərbaycanın dahi liderinin iradəsi, müdrikliyi və əzmi olmasaydı, indi gördüyümüz bütün bu inkişaf da baş verməzdi.
Mən sizə səmimi demək istəyirəm ki, 1994-cü ildə “Əsrin müqaviləsi” imzalandıqdan sonra Azərbaycanın qazandığı perspektivlər Gürcüstan üçün də inkişaf perspektivləri idi. Heydər Əliyeviç Əliyev təkcə öz Vətəninin, təkcə Azərbaycanın deyil, həm də ümumən, bütün regionun tamamilə yeni inkişafının bünövrəsini qoydu. Odur ki, bu gün biz sizinlə birlikdə təkcə burada, Azərbaycanda deyil, Gürcüstanda da ölkələrimizin gələcəyinə real surətdə inamla baxmağımızı bayram edirik. “Əsrin müqaviləsi” Bakı-Supsa neft kəmərinin inşasını həyata keçirməyə imkan verdi. “Əsrin müqaviləsi” regionumuz üçün nəhəng Bakı-Tbilisi-Ceyhan layihəsinin gerçəkləşdirilməsinə başlamağın bünövrəsini qoydu. Əgər enerji dəhlizi yaradılmasaydı, zənnimcə, indi biz Bakı-Tbilisi-Ərzurum qaz kəmərinin tikintisindən danışa bilməzdik. Əminəm ki, bütün bunlar xalqlarımızın qarşısında açılan perspektivlərin heç də hamısı deyildir. Bir sözlə, tam səmimiyyətlə deyə bilərəm ki, bu gün qeyd etdiyiniz bayram, sözün əsl mənasında, tarixi hadisənin 10 illiyi bayramı təkcə Azərbaycan Respublikası üçün deyil, Gürcüstan üçün də mühüm mərhələdir.
Bu gün Gürcüstan öz gələcəyinə çox inamla baxır. Gürcüstan çox fəal inkişafdadır və uzun illərdən bəri mövcud olan problemləri həll edir. Biz bilirik ki, qələbələr yolu ilə gedirik. Sizi inandırıram ki, Gürcüstanda bayram edəcəyimiz qələbələr ölkələrimizin ümumi qələbələri olacaqdır. Gürcüstanla Azərbaycanı çoxəsrlik dostluq, rəğbət, həyanlıq birləşdirir. Bu 10 il xalqlarımızın talelərini tamamilə birləşdirmişdir. Bu gün Gürcüstanla Azərbaycan ayrılmazdır. Gürcüstan və Azərbaycan bütün istiqamətlərdə, həqiqətən, ümumi mənafelərə malikdirlər. Odur ki, ölkələrimizdən hər birinin qələbəyə doğru yolu əməkdaşlıq yoludur, dostluq yoludur, real qardaşlıq yoludur. Mən buraya qardaş Azərbaycan xalqına çox dərin hörmət və məhəbbətimizi bir daha ifadə etməyə gəlmişəm.
Diqqətinizə görə çox sağ olun.
Bölmənin digər xəbərləri
