Gürcüstanın müxalifət partiyalarının ofislərindən tüfənglər, pirotexniki vasitələr, “Molotov kokteylləri” götürülüb
Tbilisi, 5 dekabr, AZƏRTAC
Gürcüstanın Daxili İşlər Nazirliyinin Kriminal Polis İdarəsinin əməkdaşları noyabrın 28-dən davam edən nümayişlərlə bağlı 6 nəfərin üzərində və evlərində, həmçinin ofislərində axtarışlar aparıb.
AZƏRTAC xəbər verir ki, bu barədə jurnalistlərə polis idarəsinin rəisi Teymuraz Kupatatdze məlumat verib. Onun sözlərinə görə, “İnadlar” hərəkatı, “Droa” və “Qirçi” partiyalarının ofislərində, həmçinin “Milli hərəkat”ın gənclər ofisində hakimin qərarı əsasında istintaq hərəkətləri aparılır. Həbs olunan şəxslərin üzərində və evlərində dəbilqələr, pnevmatik tüfənglər, çoxlu sayda pirotexniki vasitələr, elektrik avadanlıqları, kompüter avadanlığı, “Molotov kokteylləri”, boyalar, müxtəlif məhlullar aşkar olunub və müvafiq ekspertizalar təyin edilib.
Həmçinin Cinayət Məcəlləsinin 187-ci (əmlakı zədələmə və ya məhv etmə) və 353-cü (polis əməkdaşına, xüsusi penitensiar xidmətin əməkdaşına və ya digər nümayəndəyə basqın etmə) maddələri ilə də araşdırma aparılıb, 6 nəfər həbs edilib. Qrup zorakılığını təşkil etmək və ona rəhbərlik etmək, qrup zorakılığında iştirak etmək ittihamı ilə isə 7 nəfər həbs olunub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
