Gürcüstanın Qardabani rayonunda daha bir istilik elektrik stansiyası tikiləcək
Tbilisi, 5 sentyabr, AZƏRTAC
Gürcüstanda azərbaycanlıların yığcam yaşadıqları Kvemo Kartli bölgəsinin Qardabani rayonunda daha bir istilik elektrik stansiyası (İES) inşa olunacaq.
AZƏRTAC xəbər verir ki, Gürcüstanın Neft və Qaz Korporasiyası müasir tipli kombinə edilmiş “Qardabani 3” İES-in inşası ilə bağlı beynəlxalq təkliflər sorğusu elan edib.
Bildirilir ki, Qardabani bələdiyyəsində 272 meqavat gücə malik üçüncü İES-in tikintisi ilə bağlı qərar 2019-cu ildə qəbul olunub. Enerji obyektinin 2023-cü ildə istismara verilməsi planlaşdırılır. Yeni stansiya korporasiyaya məxsus torpaq sahəsində - “Qardabani 1” və “Qardabani 2” İES-lərinin yaxınlığında tikiləcək.
Korporasiyadan bildirilib ki, yeni İES-in inşası strateji əhəmiyyətli layihədir. Stansiya ölkənin enerji sisteminin işini daha etibarlı etməklə yanaşı, enerji təhlükəsizliyini əhəmiyyətli dərəcədə artıracaq və idxal olunan elektrik enerjisindən asılılığı azaldacaq.
Məlumat üçün qeyd edək ki, Qardabanidə ilk İES 2015-ci ildə, sonuncusu isə bu ilin yanvarında istifadəyə verilib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
