Haiti Prezidentini öldürməkdə şübhəli bilinən 28 nəfərin şəxsiyyəti müəyyən edib
Bakı, 9 iyul, AZƏRTAC
Haiti Prezidenti Jovenel Moizi qətlə yetirən silahlı qrupun azı 26 üzvü Kolumbiya vətəndaşıdır.
AZƏRTAC xarici KİV-ə istinadla xəbər verir ki, bunu Haiti polisinin rəhbəri Leon Şarl mətbuat konfransında deyib.
“Biz 28 qatilin şəxsiyyətini müəyyən etdik: onlardan 26-sı Kolumbiya vətəndaşı, ikisi isə Haiti əsilli amerikalıdır. Sui-qəsddə iştirak edən kolumbiyalılardan 15-i saxlanılıb”, - deyə Leon Şarl bildirib. Onun sözlərinə görə, hazırda səkkiz şübhəlinin axtarışı davam edir, cinayətkar qruplaşmanın yeddi üzvü isə öldürülüb.
Fakta münasibət bildirən Kolumbiyanın müdafiə naziri Dieqo Molano deyib ki, ilkin məlumata görə, Haiti liderinə sui-qəsddə iştirak edənlər istefada olan hərbi qulluqçulardır. Kolumbiya təhqiqatda iştirak etməyi qərara alıb.
Qeyd edək ki, Haiti Prezidenti Jovenel Moiz çərşənbə gününə keçən gecə öz iqamətgahında naməlum silahlı şəxslərin hücumu nəticəsində öldürülüb. Ağır yaralanan Haitinin birinci xanımı isə müalicə olunmaq üçün Mayamiyə aparılıb.
Haiti Prezidenti vəzifələrinin icraçısı Klod Cozef hücum edən cinayətkar dəstə üzvlərinin bəzilərinin ingilis və ispan dillərində danışdığını vurğulayıb. Haiti hökuməti hadisə ilə əlaqədar respublika ərazisində 15 günlük hərbi vəziyyət rejimi tətbiq edib və sərhədləri bağlayıb.
Bölmənin digər xəbərləri
