Stokholm, 12 noyabr, Nərgiz Cəfərli, AZƏRTAC

Bakıda işə başlayan COP29 tədbiri ərəfəsində İsveçin “Novus” analitik və tədqiqat şirkəti “WaterAid” təşkilatının sifarişi ilə sorğu keçirib.

AZƏRTAC xəbər verir ki, sorğunun nəticələrinə görə, vətəndaşların 62 faizi İsveçdə iqlim dəyişikliyinin artması ilə bağlı narahatlığını ifadə edir, 13 faizi isə çox yüksək səviyyədə narahatlıq keçirir.

Demək olar ki, hər dörd respondentdən biri (22 faiz) ekstremal hava şəraitinin artıq onların həyatına təsir etdiyini hesab edir. Yalnız 16 faiz cavab verib ki, iqlim dəyişikliyi onlara ümumiyyətlə təsir etmir.

“Sorğu göstərir ki, isveçlilər iqlim böhranına, xüsusən də su böhranına son dərəcə ciddi yanaşırlar. Aydındır ki, insanlar problemləri həm görürlər, həm də onları gündəlik həyatlarında hiss edirlər”, - deyə “WaterAid”in baş katibi Anna Nilsdotter mətbuata açıqlamasında bildirib.

Sorğu, həmçinin müəyyən edib ki, xüsusilə 35-49 və 65-84 yaş qruplarında olan qadınlar kişilərə nisbətən daha çox narahatdırlar, qadınların 70 faizindən çoxu yüksək dərəcədə narahatlıq bildirir. Kişilərin isə yalnız 48 faizi narahatdır. Respondentlərin əksəriyyəti - 59 faizi hesab edir ki, İsveç hökuməti iqlim dəyişikliyi ilə mübarizədə kifayət qədər iş görmür.

“Ekstremal hava şəraiti adi hala çevrilir. İqlim böhranı əsas etibarilə su ehtiyatları böhranıdır və hökumət prioritet şəklində ən həssas qrupları dəstəkləməlidir. Su insanın təbii hüququdur və sağ qalmağımız üçün həyati vacib resursdur. Bu, xüsusilə COP29 zamanı İsveçin iqlim siyasətində və İsveçin yardım proqramında öz əksini tapmalıdır”, - deyə A.Nilsdotter bildirir.