HİNDİSTAN ƏCZAÇILARI ÖZ MƏHSULLARINI AZƏRBAYCANDA NÜMAYİŞ ETDİRİRLƏR
Noyabrın 15-də Bakıda Hindistan Əczaçılıq Məhsulları İxracının İnkişafı Şurasının təşkilatçılığı ilə bu ölkənin əczaçılıq sənayesi məhsullarının satış-sərgisi açılmışdır. Şuranın icraçı direktoru Racuvir Kini AZƏRTAC-ın müxbirinə bildirmişdir ki, 11 şirkətin iştirak etdiyi sərgidən əsas məqsəd Hindistan istehsalçıları ilə Azərbaycan dilerləri arasında əlaqələrin yaradılmasıdır. Hindistanın informasiya texnologiyaları ilə yanaşı, əczaçılığı da dünyada məşhurdur. Şuranın sədrinin sözlərinə görə, Hindistan dərmanlarının Azərbaycana ixracı ilbəil artır. Belə ki, 2001-ci ildə Hindistandan ölkəmizə 1 milyon dollarlıq dərman gətirilmişdisə, bu il həmin rəqəm 9 milyon dollara çatmışdır.
Hindistan nümayəndə heyətinin Azərbaycan Səhiyyə Nazirliyində, Ticarət və Sənaye Palatasında keçirdiyi görüşlər zamanı əczaçılıq sənayesi məhsullarının ticarəti sahəsində əməkdaşlıq haqqında memorandum imzalanmasına hazırlıq barədə razılıq əldə edilmişdir.
Sərgidə dava-dərmanla yanaşı, cərrahiyyə alətləri, bitki mənşəli məhsullar da təqdim olunmuşdur.
Bölmənin digər xəbərləri
